Ujarannguussimasut saqqummersinneqarnissaat tamatsinnut iluaqutaasussaasut
Ujarannguunnikuusorineqartut nassaarineqareersuni pisoqaanerpaajusorineqartut Nuummi saqqummersinneqassappata Nunatsinnut takornarianullu pitsaassaaq. Aatsitassanut naalakkersuisoqarfimmi ujarassiuut pisortaat, Julie Hollis, taama isumaqarpoq.
Ilisimatuut australiamiut ujarannguunnikuusorisatik ukiunik 3,7 milliardinik pisoqaassusillit Nuup avannaata tungaani Isuami nassaarisatik pillugit ilisimatuutut allaatigisamik sapaatit akunnerata siuliani saqqummiipput.
Nassaallu ujarannguunnikuusuussappata nassaarineqartunit tamanit pisoqaanerpaajussapput, nunarsuarmilu uumassusilinnut siulliit ilaanniittunut nutaanik ilisimasaqartitsilersinnaallutik.
Ilisimatuut allaatigisamik saqqummiisut nassaatik ilaasa Nuummi saqqummiunneqarnissaannik siunnersuuteqarput, tamannalu aatsitassanut naalakkersuisoqarfimmi ujarassiuut pisortaata, Julie Hollisip qiimmatsaatigaa.
- Isumassarsiaalluartorujussuuvoq. Kalaallit Nunaanni, ingammik Nuup eqqaani, geologii nunarsuup qaavaniittunik pisoqaanersaat ilaanniittunik ujaraqarpoq. Taamaammat nunap ilaa taanna silarsuamut pingaaruteqarpoq. Nassaat nutaat Kalaallit Nunaannilu katersat allat saqqummersinneqassappata kikkunnut tamanut takuneqarsinnaalissapput ilinniarfigineqarsinnaalissallutillu. Taamaammak tamaani najugalinnut takornarianullu sunniuteqartupilussuussapput, Julie Hollis oqarpoq.
Nassaalli oqallitsitsipput. Københavns Universitetiani ujarassiuutut professorip Minik Rosingip nassaat ilumut ujarannguunnikuusuunersut apeqquserpai.
Nassaalli ujarannguunnikuusuusimanngikkaluarpata saqqummiunneqarnissaat suli isumassarsiaalluaasoq, Julie Hollis isumaqarpoq.
- Inunnut suli oqallitsitsisinnaassapput. Ilisimatuut nunarsuarmi uumassusillit siulliit pillugit sooq qanorlu paasiniaasarnerannut paasititsisinnaassaaq. Kalaallit Nunaata geologiia ilanngussisinnaaqaaq, nassaallu ujarannguunnikuusuunngikkaluarpata saqqummersinnissaat suli isumassarsiaalluartupilussuuvoq, Julie Hollis oqarpoq.
