Ujammit 60-it The Hodgson Trophylu Kalaallit Nunaannut

Issittumi nunallit Alaskami Fairbanksimi unammiuaarnerat ippassaq naammassivoq. Mannalumi naggataarnersiorneq! Kalaallit Nunaat 60-nik ujaminnaannanngilaq – kuultit 23-t, sølvit aamma 23-t, bonzillu 14-it. Tassa Kalaallit Nunaanni Timersoqatigiit Kattuffiata neriuutigisaanit angorusutaannillu qulinik amerlanerit angerlaatissavaat. Naggataarnersiorlunili naggataarnersiornermi ataqqinaammik nersornaat “The Hodgson Trophy” aamma pissarsiaraat. .
Allattoq Carla Davidsen
marsip 23-at 2014 14:51

 Ataqqinaammik "tammajuitsussaq" taanna kalaallit unammiat holdiisa siulersuisuannut, Lauritz Heilmannimut, tunniunneqarpoq, taannalu soorunami nuannaaqaaq:

 - Unammisuvut sungiusaasullu maligassiuilluarsimasut takutitsilluarsimasullu tamassuma ersersippaa. Kalaallit Nunarput nersornaammik tunineqarmat tulluusimaarutigalugulu nuannaarutigeqaarput. Timersortartutta takutitsilluarnissaat Timersoqatigiit Kattuffiannit kissaatigiuarparput, Lauritz Heilmann oqarpoq., aamma oqarluni saqqarmiuarannguamik, meqqutitut isikkulimmik, kalaallit tamarmik aamma pissarsisut, taannalu Hodgson Trophymik pissarsisimanerannut takussutissaassasoq.

 The Hodgson Trophy, Issittumi nunallit unammiuaarneranni peqataasut tamarmik taasissutigisinnaavaat, namminneq nuna sinniisuuffigisartik aamma toqqarsinnaallugu.

 Tassa Nunat Issittumi nunallit tamarmik tammajuitsoq taanna Kalaallit Nunaannut kusanartumik inuulluaqqusutigaat, kalaallit unammiat Fairbanksimi takutitsilluarsimanerannik oqarfigerusullugit.

 Kalaallit arsaattartui nukappiaqqat Northwest Territoriesimut ippassaq unammigamik, 6-2-millu ajugaallutik, kuultinnattaartik kingulleq pissarsiaraat.

Citesilli malittarisassai pissutigalugit Hodgson Trophy Fairbanksimiiginnartariaqassaaq, qilalukkat tuugaavinik nunamit annissinissaq inerteqqutaammat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq