64-nik ukiulik ujaarineqartoq illuaqqami nassaarineqartoq
Maniitsumi angut 64-nik ukiulik qassutini alakkarniarlugit sisamanngornermi ullaakkut aallartoq utinngimmat, tallimanngornermi ujaarineqartutut nalunaarutigineqarpoq.
Angutip qanigisai ernumalermata, Kalaallit Nunaani politiit kalerrinneqarput, tamatumalu kingorna, Issittumi sakkutooqarfiup umiarsuaa Ejnar Mikkelsen, politiit, taamatullu Maniitsormiut ujaasillutik aallartipput. Ujaaseqataasut ilaasa Maniitsuminngaanersut angut 64-nik ukiulik arfininngornermi ullaap tungaani illuaqqamiittoq nassaaraat.
Ujaarineqartoq qassusiarnermini VHF-radio-mik aamma sumiissusersiummik GPS-mik nassataqarpoq.
VHF- radioali sila ajortillugu tusaaneqarsinnaasimanngilaq, sinerissap annersaani tallimanngormat silarlummat.
Silap ajornera taamatullu pujornera pissutigalugu, Air Greenlandip qulimiguuvi , Issittumi Sakkutooqarfik politiillu angutip ujaarineqarnerani ajornartorsiorput
Taama oqarpoq Issittumi Sakkutooqarfiup tusagassiisartua presseofficer Camilla Schouw Broholm KNR-imut.
Angutip VHF-radioa sila ajortillugu ungasissumiillu tusaaneqarsinnaasimanngilaq.
Aamma sumiissusersiummik GPS-mik nassataqarsimavoq, taannali ajutuulernermi ajornartorsiornermiluunniit kalerrisaarummik atortoqarsimanngilaq.
Angutip umiatsiaarata motooria ajortimmat, ingerlariaqqissinnaasimanngilaq.
Issittumi Sakkutooqarfimmi paasissutissiisartup oqaluttuarnera naapertorlugu umiatsiaaqqami iputeqarsimavoq, angullu ipulluni illuaqqap tungaanukarsimavoq, tassanilu oqquilluni.
Tassanilu arfinngornermi ullaap tungaani Maniitsormiunit nassaarineqarluni