Ujaarineqaleraluartoq ajunngitsoq nassaarineqartoq
Umiatsiaaraq ammasoq fodinillu 16-inik takissusilik, piffissaq eqqorlugu Qaqortumut tikissimanngilaq, inualu oqarasuaatikkut angallattakkakkut vhf-radiokkullu attaveqarfigineqarsinnaasimanani.
Piaartumik Aasiaat Radioa ikioqqussummik nassiussivoq, Kangilinnguanilu sakkutooqarfik, kiisalu timmisartumik annaassiniutit Kangerlussuarmiittut pisumut akuliutsinneqarput.
Kangilinnguani sakkutooqarfik iliuuseqapallanneratigut umiarsuit piffimmi ujaasitinneqalerput, Politiillu qulimiguulimmik attartornermikkut ujaasinermi peqataatinneqalerlutittaaq.
Ujaarineqartoq Ikerasassuarmi, Narsarsuit eqqaanni qulimiguulik atorlugu minutsit 35-t ingerlareersullu ajunngitsoq nassaaraat. Ujaarineqarluttu umiatsiami orsussaa nungungajallugu ingerlasimasoq paasinarsivoq.
Maqaasineqaleraluartoq nassuiaavoq ingerlaarnermini gps-ini katassimallugu, taamaattumillu putsumit sumiissusersisinnaajunnaarsimalluni. Taamatuttaarlu vhf-ini angallattagaq attaveqarsinnaasimanngitsoq oqaatigaa, naak qaqqap qaaniit misilittarsimagaluarlugu. Silaannarmi unnuisariaqarsimalluni oqaatigaa.
Kingorna angut ujaarineqaleraluartoq umiatsiarluni Qassimiunut orsersoriartorpoq, Politiimillu ilalerluni Qaqortumut ingerlasussaasoq nalunaarutigineqarluni.
Oqartoqarsinnaavorlu Politiit, Kangilinnguani Sakkutooqarfik, Aasiaat Radioat, kiisalu timmisartumik annaassiniartartut Kangerlussuarmeersut suleqatigiilluarnerisigut ujaasineq ajunngitsumik inerneqarmat.
