Katersugaasivimmi umimmaap niaqua sullineqartoq
Katersuugaasivimmi saqqummersitat arlaqartut sullinernik nassaarfigineqarmata, nassaarfigineqartut qerititsivimmiitinneqarput septemberip ulluisa aallaqqaataata tungaanut.
Avannaata Kommunia tusagassiuutinut nalunaaruteqarluni taama paasissutissiivoq.
Nunata Katersugaasivianit oqaatigineqartut naapertorlugit sullerngit tassaapput klannerit amerikameersut Uummannap Katersugaasiviani nassaarineqartut.
Sullerngit naassaarineqarnerisa kingorna Uummannami Katersugaasivik juunip ulluisa 17-anni matuneqarallartoq, kommunemit nalunaarugineqarpoq.
- Sullinernik nassaarfigineqarnerpaasimasut tassaapput, umimmaap niaqua kiversimasoq kamisallu natermiittut.
- Qujanartumilli katersaatit saqqummersitsiviit iluiniittut nassaarfiginngilagut, kisianni umimmaap niaqua sullerngit quperluinik peqarpallaaqimmat igiinnartariaqarsimavarput. Arnaaraq Lange Uummannami pinaveersaartitsisoq aammalu katersugaasivimmi paarlattaagallartutut sulisoq oqarpoq
Taassuma ilanngullugu oqaluttuaraa kalaallisuut arfineq-marluk, angutit atisaat marluk, Qilakitsormiut atisaasa assilineqarneri marluk aammalu Qilakitsormiut atisaat ataaseq kiisalu oqorsaatit ataasiakkaat sullinernik nassaarfigineqarsimasut.
Qerititsivimmi nunungusarniarneqassapput
Katersugaasivimmi sulisut sullerngit nungusarniarlugit katersugaatinik containerini qerititsivinniititsillutik aallartissimalereerput.
Nunatta Katersugaasiviata saniatigut Danmarkimi aanaveersaasartunit aammalu Aasiaat katersuagaasiviani sulisunit sullinernik taamaattunik nalaataqarnermi misilittagallinnit siunnersorneqarsinnaasimapput.
- Siunnersorneqarnerput iluaqutaaqaaq, paasitinneqarpugullu sullerngit klanner-it amerikameersut pineqartut amernik saassussisartut aammalu saanerni qisunnilu manniliortartut, taamaammallu sullerngit quperluisalu toqorarnissaat qulakkeerumallugu katersugaatit sivikinnerpaamik sapaatip akunnerani ataatsimi qerititsivimmiitissavagut, Arnaaraq Lange oqarpoq.
Sullerngit nungusarluarnissaat qulakkeerniarlugu qerititsivimmiitereernerisa kingorna qaammat ataaseq affarlu katersugaasivimmut eqqunneqaqqusaanngillat.
- Taamaammat qerititsivimmiititsisarnerput septembarip aallaqqaataata tungaanut ingerlakkallassavarput. Tamatuma saniatigut sullinernik quperluinillu katersugaasivimmut eqqussinaveersaartussaavugut, aammattaaq katersugaasivimmi suna tamaat angullugu eqqiaatitsisussaalluta, Arnaaraq Lange oqarpoq.