U21-VM-imi Kalaallit ajugaapput 27-raarlutik Libyamiut 26-raartut
Ajorsarneq taanna pakatsinartorujussuuvoq, tamannali ullumi qaangiuppoq, unammiallu tamarmik qungularrateqaat.
- Ullumikkut ajugaanissaat qanoq iluatsippa?
- Unamminermi isertitsinerpaaq, Aqqaluk Sørensen, sekundi kingullerpaaq atorlugu isertitsivoq, tamannali pivoq, unamminerup taama pissanganartitigisumik ingerlanneqarsinnaaneranut kalaallit imminnut qutsavigisinnaanngoreeraluartut. Iligiit ullumi arsarluarpallaanngikkaluarput, periarfissarpassuit annaavaat, unamminerulli naammassilivinnerani ilungersorallartillutik Kalaallit Nunaat kiisami tassa ajugaavoq.
- Kalaallit assammik arsartartut nunanut allanut unammisartui unamminerusarnissaminnut periarfissinneqaraluarpata, siunissami tamanna aqqutissaalluaraluarpoq, Noah Mølgaard tikkuaavoq.
- Kalaallit unammisartui ullumi unamminerup naammassiartornerani holdit allat sungiusaasuinit kakkagineqarlutillu tupaallaatigineqaqaat. Unammisartut arlallit sungiusaasorpassuit paasisaqarfigerusuppaat, Kalaallit Nunaat taamaalilluni ataqqineqalerpoq, Noah Mølgaard, Sermitsiami aviisiliortoq, KNR-imillu malinnaatitaasoq, oqarpoq.
Libyamut unamminermi kalaallit isertitsisut makkuupput:
Aqqaluk Sørensen, arfineq-marloraartoq, Miilu Rosing, arfinileraartoq, Miki Heilmann, tallimaraartoq, Angutimmarik Kreutzmann, sisamaraartoq, Johannes Groth, marloraartoq, Nuuno Lars Olsen, marloraartoq taavalu Nuka Heilmann ataaaseraartoq.
Nunanut allanut unammisartut aqagu qasuersaassapput. Illoqarfimmut Suezimut iluatsillugu nutsissapput, Kalaallit Nunaat 17-imiit 20-nngorniunnermut sisamanngorpat tallimanngorpallu tamaani unammissammat. Kikkut unammissaneraat ullumi kingusinnerusukkut aatsaat paasinarsissaaq,, unamminerit kingulliit pereerpata.
