U21-t: Kalaallit Hollandimiunut ajorsarput

Assammik arsarnermi U21-ni Nunatta nunanut allanut unammisartui Igitsinimi nunarsuaq tamakkerlugu unammersuarnermi, ullumi pingajussaa ajorsartinneqaqqipput.

Allattoq Elisa Isaksen

aggustip 10-at 2009 16:56

Tamatumuuna ajorsarfigineqartut tassaallutik Hollandimiut 39-37-mik ajugaasut, nikinnermi målinik arfineq marlunnik siuaqqareerlutik.

Noah Mølgaard unammersuarnerni malinnaasuusoq oqarpoq, unamminerup immikkoortuani siullermi kalaallit periarfissaminnik atorluaannginnerat akisunaarneqartoq. Ullumikkut assut unamminerliortut Igitsinimit nalunaarutigineqarpoq.

Tamannali unamminerup immikkoortuata aappaani iluarsineqarpoq, piumassuseqarluarlutillu unammilerlutik.

Miki Heilmann Aqqaluk Sørensen peqatigalugu unammilluartoq oqaatigineqarpoq. Unamminerup immikkoortuata aappaani piffissap annersaani Holland målinik arfinilinnik siuaqqavoq. Kalaallilli malinnaalluarnermikkut, unamminerup nammassinissaanut minutsi ataasiinnanngortoq målimik ataasiinnarmik kinguaqqalerput.

Dommerit Nunatsinnut iluaqutaavallaanngitsut aamma oqaatigineqarpoq, tassami kalaallit strafferlutik isertitseriarnissaralui arlallit pinngitsoormata.

Holland 39-37-mik ajugaavoq. Kalaallini Miki Heilmann qulingiluanik isertitaqarluni isertitsinerpaavoq.

Kalaallini isertitsisut allat ukuupput:

Aqqaluk Sørensen 7

Akutaaneq Kreutzmann 4

Angutimmarik Kreutzmann 4

Nuka Heilamann 4

Muusaarannguaq Osterman Søholm 2

Henrik Kreutzmann 2

Anguteeraq Kronvold 2

Nuunu Lars Olsen 1

Danny Brandt 1