Tysklandimi biili ateqarpoq: Amarok
Biili nutaaq ullumimiit aqqusinerniilerpoq, taanna taaguuteqarluni Amarok. Nittartakkami Umimmag.gl-imi tamanna allaaserineqarpoq, aalajangersumillu oqaatigineqarpoq Volkswagenip biilimik taama atsiinermigut ersersinniaraa, biili qajannaatsuusoq, pinertulluni, ussissuulluni torrallataallunilu, aamma pingaakujuttutullusooq taasinnaavarput, soorlu amaqqut taamaattuusut.
Taamalu oqalunneq eqqortortaqarunarpoq.
Biili nutaaq Amarok tassaavoq pick-up trucki angisooq, assakaasunit sisamanit ingerlatitaq. Europami pisiniarfinni ukiarumiit tunisaalissasoq ilimagineqarpoq.
Amarok aamma tassaavoq pick-up trucki siulleq Europami biililiorfinnit sananeqartoq, Japanimimi biililiorfiit tassaasimapput biilinik taamaattunik manna tikillugu sanasarsimasut. Biililiorfiup Volkswagenip aamma ilisimatitsissutgaa biili avatangiisinut ajoqutaasussaanngitsutut sanaajusoq. Taannamigooq CO2-mik aniatitsisorsuunngilaq. Biili kalaallisut atserneqartoq Nunatsinnut tikissanersoq suli nalunarallarpoq, amarorlu assakaasunit sisamanik atisalillugooq qanoq akeqassanersoq suli aamma isertuunneqarallarluni.