Tyskland qimaasunik ikilisaasalerniarpoq
Tysklandimi qimaasunut tunngasunik politikki, Australia assigalugu, sukaterneqalertoq, tyskit ministereqarfiat paasissutissiivoq.
Tyskit aviisiat Welt am Sonntag taama allaaserisaqarpoq.
EU-mut ilaasortat sinneri politikkertik aamma sukatertariaqaraat, ministereqarfik ilaatigut kajumissaarivoq.
Qimaasut umiatsiamik nunamut tikittut Australiami najugaqarnissaminnut akuersissummik tunineqarsinnaajunnaarnikuupput.
Qimaasut umiatsiamik unioqqutitsillutik nunamut tikittartut, nunamut piitsuuffioqisumut Naurumut inissinneqarallartalernikuupput, aallarfimminnit angerlartitaanissaata nunamulluunniit allamut aallartitaanissaata tungaanut.
- Europap sineriaanut qimaaffissaaruppata ikaarniaraluartillutik ulorianartorsiorsinnaasut ikinnerulissapput, tysklandip naalagaaffimmi pissutsinut ministereqarfiup oqaaseqartartua aviisimut oqarpoq.
