Tyskit nunanut allanut ministeriat: Navalnyj piaartumik iperagaasariaqarpoq
Ruslandimi illuatungiliuttut siuttuat Aleksej Navalnyj sukkanerpaamik iperagaasariaqartoq, Tysklandip nunanut allanut ministeriata Heiko Maasip ataasinngornermi oqaatigaa.
- Rusland tunngaviusumik inatsisimigut pituttugaavoq, nunallu tamalaat inatsisaat tunngavigalugit naalakkersuinissamut inuttullu pisinnaatitaaffiit eqquutsinnissaannut pisussaaffeqarpoq, Maas nalunaarummi allappoq.
- Pisussaaffiit taakku ataqqineqartariaqarput, Aleksej Navalnyjimullu suliami atuuttariaqarlutik. Sukkanerpaamik iperagaasariaqarpoq, taanna ilanngullugu oqarpoq.
AAMMA ATUARUK Russit illuatungiliuttut siuttuat Ruslandimut utilersaartoq
Navalnyj Berlinimiit Moskvamut sapaammi tikinnermi kinguninngua tigusarineqarpoq. Navalnyj novichokimik taaguutilimmik toqunartutortinneqarluni siorna toqunneqariaraluarnermi kingorna Ruslandimut aatsaat uterpoq.
Navalnyjip Moskvamut tikinnermi kingorna tigusarineqarnera Maasip paasisinnaanngilluinnarnerarpaa.