Twin Otteri piginneqataassutinik taarserneqarpoq

Twin Otterimik tunisineq Air Greenlandip ukiunut tallimanut pilersaarutaanut ilaavoq, tassani timmisartuutit assigiissarniarlugitsiunissami ikililerinissaq siunertaammat.

Nordlanair marlunnik Twin Otteriuteqareerpoq, taakkulu Air Icelandimit, ukiut pingasut matuma siorna pissarsiaralugit.

Norlandairip Kalaallit Nunaanni – Tunup Avannaaniunerusoq - Twin Otterit atorlugit sullissineq misilittagaqarfigilluarpaa, taavanimi timmisartut sumiiffinni assigiinngiiaartuni mittarfinnilu takinngitsuni missinnaasut atorfissaqarluarput. Air Greenland tusagassiuutinut nalunaarummini taama ilisimatitsivoq.

Siunissamimi inuilaarsuarmi aatsitassarsiornermik ingerlatsinermi timmisartunik atuinissap annertusiartornissaa Air Greenlandimit naatsorsuutigineqartoq timmisartunik attartortitsinermut pisortaq Hans Peter Hansen oqarpoq.

Akureyrimi oktobarip 18-ni immikkut ittumik ataatsimeersuartoqarnerani aningaasaqarnermut pisortaq Mogens Jensen aamma timmisartunik attartortitsinermut pisortaq Hans Peter Hansen Norlandairip siulersuisuinut ilanngupput, kingulleq siulersuisunut siulittaasunngorluni.