TV2-kkut tusarnaartitseqatigereerlugit Maasi nersualaarneqartoq
Rappertartup KNR-imi ulluinnarni tusagassiortutut atorfeqartup festivalimi 35.000-inik tusarnaartoqarluni tusarnaartitsinermi torrutiinnarlugu rapperiaatsimik qanoq piginnaasaqartiginerluni takutillualaavippaa. TV2-p erinarsortua Steffen Brandt KNR-imut e-maiIikkut allappoq kalaallit nunaqqatertik tulluusimaarutigilluarsinnaagaat.
- Nuummi juullikkunni tusarnaartitsinerni Maasi arlaleriarluta tusarnaartitseqatigisarparput rappillaqqissusaanillu assut nersortarlutigu. Taamaammat aamma torrutiinnarlugu rapperiaasiata danskinut tusartisaallugu piukkussimavarput. Tusarnaartut 35.000-it missaanniittut tusaavaat alutorsaatigivissorlugulu, Steffen Brandt nuannaaqaluni taama allappoq.
Maasi Pedersen TV2-p Aarhusip eqqaani festivalerujussuarmi tusarnaartitsinerani pulaartigineqartut arlallit ilagaat. Tina Dickow, Marie Key aamma Minds of 99 aamma scenemut qaqipput.
Tusarnaartitsineq danskit naliliisartuinit kingorna nersualaarneqarluarpoq, TV2-llu tusarnaartitsinera aviisini BT-mi Gaffamilu ullorissanik tallimanik tunineqarluni.
- TV2-p naggasiilluni tusarnaartitsinera nipilersornikkut torrallataalluinnarpoq tallimanillu ullorialerneqartariaqarluni, BT-p naliliisartua Jan Have Eriksen tusarnaartitsineq pillugu ilaatigut taama allappoq.
Maasi Pedersenip tusarnaartitsinini aamma iluarisimaarpaa, naak tusarnaartullu oqaatsitigut aporfeqalaaraluarlutik.
- Misigisaq nuanneqaaq. Imaassinnaavoq amerlanerit oqaatigisakka paasinngikkaat, rapperiaaserali tamarmik paasivaat, rappertartoq nipilersoqatigiinni Prussicikkunni ilisarisimaneqaleqqaartoq taama oqarpoq.
- Inuit nuannersorsuupput, Maasi Pedersen TV2-kkormiut pillugit oqarpoq. Taakku nunatsinnut tusarnaartitsiartortarnerini arlaleriarluni tusarnaartitseqatigisarsimavai.
