TV-ni igasoq: - Savaaqqat inequnarluinnartut uagut aamma nerisarpavut
TV-mi igasoq new zealandimiuuvoq maannalu Tuluit Nunaanni najugaqarluni. Nunat assigiinngitsut assigiissutaat takusinnaasarpai, soorlu nunap ilarujussui najugaqarfigineqanngitsut New Zealandimiittut Nunatsinnut assingunerarpai.
TV-mi igasup puisip aamma arferup neqaanik nerisassiornissani naatsorsuutiginngilaa. Taamaattorli aallakaatitassiami kalaallit puisinniartarnerat arfanniartarnerallu sammineqassasut Sermitsiamut nassuiaavoq.
- Puisit arferillu kalaallinit piniartunit qanoq piniarneqartarnerisa nunarsuarmiunit paasineqarnerunissaanut ikiuussinnaassalluta neriuutigaarput, nassuiaavoq.
- Tamanna savanut Tuluit Nunaanni pigisatsinnut, inequnarluinnartunut, assersuutipajaarsinnaasarpara. Taakkumi nerisarpavut, amerlaqisunillumi savaateqarpugut. Tassami nunap tunniussinnaasai innuttaanit inuussutigineqartariaqarmata, Chris Coubrough oqarpoq.
Aallakaatitassiassaq siulleq ukiormanna aggusti naajartulerpat Tunup Kujataani immiunneqassaaq.