Tuusip illussaanut paasissutissat paasiuminaatsut
Inatsisartut aningaasaqarnermut ataatsimiititaliap decembarip 30-ani 2011-mi ataatsimiinnerisa imaqarniliornerani atuarneqarsinnaavoq Inatsisartut siulittaasuata illussaanik pisinissamut 6 millionit koruuninik Naalakkersuisut qinnuteqartut. Maluginiagassaalluni pisinissamut qinnuteqartoqartoq.
Imaqarniliami aamma atuarneqarsinnaavoq: ”Inatsisartut siulittaasuata illua isaterneqassaaq kingorna nutaamik illuliortoqassalluni. Tamanna naatsorsuutigineqarsinnaalluni ukiut marluk ingerlanerini suliarineqassasoq.” Tamatumani allassimasoqanngilaq isaterinissamut nutaamillu sananissamut aningaasat qassit atorneqassanersut.
Ineqarnermut, Attaveqarnermut Angallannermullu Naalakkersuisoqarfiup Naalakkersuisunut allagaani atuarneqarsinnaavoq Inatsisartut siulittaasuanut utaqqiisaasumik illumik naleqquttumik pisisoqassasoq. Illu Inatsisartut siulittaasuata illuata nutaamik sananeqarnerani atorneqarsinnaassaaq. Naalakkersuisoqarfillu erseqqissaavoq illu Naalakkersuisunit kingorna najugarineqarsinnaasoq tuniniarneqarsinnaasorluunniit.
Naalakkersuisoqarfillu ilisimatitsivoq Inatsisartut siulittaasoqarfiata kissaatigisimagaa Inatsisartut siulittaasuata illu attartugaa 5,6 million koruunilerlugu pisiarineqassasoq.
Allassimasoqanngilarlu Inatsisartut siulittaasuata illua isaterneqarpat nutaamillu sanasoqarpat, taanna qanoq akeqassanersoq.
Aaqqissuisoqarfimmit Namminersorlutik Oqartussanit erseqqissartikkusukkaluarparput Inatsisartut siulittaasuata illuata isaterneqarnera nutaamillu sananeqarnera qanoq akeqassanersoq, tamanna aningaasaqarnermut ataatsimiititaliap ataatsimiinnerisa imaqarniliaani aamma Ineqarnermut, Attaveqarnermut Angallanermullu Pisortaqarfiup Naalakkersuisunut allagaani allassimanngimmat.
