Tuukkap minnissaanut minutsialuinnanngortut KNR attaveeruppoq. Aanali nassuiaat
Nuummi mittarfissuup timmisartorsuarmit atoqqaarfissiorneqarnissaanut KNR-TV ippassaq sisamanngornermi aallakaatitsinermini attaveeruppoq.
Sooq toqqaannartumik aallakaatitsineq attaveerussimanersoq KNR-TVimi pisortaq Mathias Davidsen nassuiaateqarpoq.
-Ajoraluartumik inupparpassuit ataatsikkut timmisartorsuup milernerani ataatsikkut live-rlutik imaluunnit toqqaannarlutik facebookikkut allanullu immaqa nassiussuillutik pilermata taava nassitsissutitta signali tigooqqagaa annikippallaalerluni attaveeruttoorpugut, KNR-TVmi pisortaq Mathias Davidsen oqarpoq.
Signali ataasiinnaasoq
Toqqaannartumik aallakaatitsinissamut attavik artukkerneqarpoq, inuppassuimmi facebookikkut toqqaannartumik malinnaaffigineqarsinnaasumik immiussinerat attavinnik artukkiisoq, Mathias Davidsen oqaluttuarpoq.
Mittarfimmiillu toqqaannartumik aallakaatitsinissamut attavik atorneqartoq, inuppassuarnik aamma allanit atorneqarpoq taamaammallu toqqaannartumik aallakaatitsineq unippoq.
Inuit Facebookikkut toqqaannartumik isiginnaarneqarsinnaasumik immiussisinnaappata, KNR-ilu toqqaannartumik aallakaatitsisinnaanani paasiuminaassinnaagaluartoq, KNR-ip attavimmik sukkanerusumik pisariaqartitsinera ersiutaaginnartoq, Mathias Davidsen oqaluttuarpoq.
-Facebookikkut bredbåndimik annikinnerusumik pisariaqartitsillutik taamaammat bredbånd facebookip atugaa annikinnerummat ajornannginnerusumik nassitsisinnaasarput, taanna oqarpoq.
Aatsaat attaveerutinngitsoq
KNR-TV Avannaata Qimussersuartoqarnerani siornatigut toqqaannartumik aallakaatitsinermini aamma attaveerutereerpoq.
Attaveqatitigut -Tusassimi - atortut allanngortinnagit attavik pitsaanerulerallarnavianngitsoq, KNR-ilu tamanna pillugu qanoq iliuuseqarsinnaangitsoq,tv-mi pisortaq oqaluttuarpoq.
-Soorunami kissaatiginaraluaqaaq taamatut pisoqaqqissanngitsoq, kisianni siammarterisuninngaannniit atortut taakkua pigineqartillugit neriorsuutigisinnaanngilarput ajoraluartumik taamatut pisoqaqqissanngitsoq siunissami, Mathias Davidsen oqarpoq.
Tusass tassunga tunngatillugu oqaaseqartinniarlugu KNR-imiit attavigaarput.
