Tuttut isaasa qalipaataat ukiukkut allanngortarput
Quianakujuttumik tamatuminnga paasinnittut tassaapput Norgemi Tromsømi Universitetimi ilisimatuut.
Tromsø qaasuitsup killeqarfiata avannaatungaaniippoq, taamaammat seqineq aasakkut ulloq unnuarlu kaaviinnartarpoq, ukiukkullu kaperlattarluni.
Tuttut isaat kuultitut aasakkut qalipaateqartarput, ukiukkulligooq tungujortoq taartumik qalipaateqalersarlutik. Tuttut isaasa qalipaataat timip ipiutaasartaani isip ameraasaasa ilorlersaanni pisartoq, ilisimatuut paasivaat.
Timip ipiutaasartaata qaamaneq takkussinnaasoq isip ameraasaata utertittarpaa. Tuttup avatangiisimini qaamaneq marloriarlugu "takusinnaalersarpaa" - taamaammat qaamaneq qanorluunniit annikitsigigaluarpat malugisinnaalersarlugu.
Paasisaq nutaaq taanna ima paasineqarpoq: Uumasut isigisinnaassusiannik ilisimatooq puussiamik tuttut isaannik imalimmik nassitsitsimavoq. Isit ilaat tuttut ukiukkut pisat isaannik imaqarsimapput, allat aasakkut pisat isaannik imaqarlutik.
Tuttut isaasa qalipaataasa allanngortarnerannut pissutaasoq ilisimatuut aamma paasivaat. Issittumimigooq avatangiisini qaamaneq aasamut naleqqiullugu ukiukkut tungujuaarnerusarpoq.