Tuskip silap pissusiata allanngoriartorneranut isiginninnera Nunatta sakkortusivaa
Tuskip Nunatsinnut tikeraarnermini silap pissusiata allanngoriartornerata sunniutai paasisinnaanerulerpai.
- Nukingerluta aaqqinniagassatsinnik ajornartorsiuteqartugut maani uppernarsaatissaqarpoq, EU-p præsidentia Donald Tusk oqarpoq.
Taassuma sivikitsumik tikeraarnermini sermersuaq, Ilulissat Kangiat Ilimanarlu alakkarpai.
Silallu pissusia allanngoriartortoq nammineq isiminik takuaa.
Aamma atuaruk ASSIT Donald Tuskip nunatsinnut tikeraarnerani ullut aappaat
Taamaammallu nunarsuarmiut iliuuseqarnissaat piffissanngortoq, Donald Tusk isumaqarpoq.
- Parisimi isumaqatigiissutip, COP21-p, piviusunngortinnissaa pingaarnerpaavoq, Tusk oqarpoq.
Nunatsinnilu takusani eqqarsaatiminiitillugit nunat aningaasarsiornikkut siuarsimanerpaat arfineq marluk, G7-inik taaneqartartut, japanimi maaji naalerpat ataatsimiilerpata, taavalu nunat aningaasaqarnikkut anginerpaat 20-it, G20-inik taaneqartartut, Kinami septembarimi ataatsimiilerpata peqataajartussaaq.
Aamma atuaruk ASSIT & VIDEO Tusk Ilulissanut tikippoq
Taakkunani peqataaleruni Parisimi isumaqatigiissutip sukkanerusumik piviusunngortinniarnissaa ilungersuutiginiarpaa.
- G7-mi G20-milu ataatsimiilerutta Kalaallit Nunaanni takusakka tunngavilersuutitut atorluarsinnaassaqaakka, Tusk oqarpoq.
Aamma atuaruk Nuimasunik tikeraartoqarneq politiit piareersimaffigaat
Angalaqataasup, Danmarkip ministeriunerata, Lars Løkke Rasmussenip, COP21-mik taallugu isumaqatigiissuteqarnerup kingornatigut siunissaq isumalluarfigineruaa.
- Isumaqatigiissuteqarpugut, angusarissaarniarpallaanngilagut, kisianni aallartippugut, nunallu atsioqataasut tamarmik anguniagassanik tigussaasunik naammassiniagaqarput. Europap isumaqatigiissummi anguniagaanik sukkanerpaamik atuuttussanngortitsinissaa, Donald Tuskip Kalaalllit Nunaannukaqatigineranut peqqutaavoq. Taassuma saniatigut
Parisimi isumaqatigiissut naammassiniarlugu kikkut qanoq iliussanersut, EU-mi ilaasortaasugut 28-it ilutsinni isumaqatigiissusiortussaavugut. Tassalu aallartereerpugut, Lars Løkke Rasumussen oqarpoq.