Tusass: "Inuiaqatigiinnut utertitserusunneq"
Tusassip aningaasaleeqataanissamut najoqqutassiartik nutaaq, suliffeqarfiup aningaasaliissutaasa inuiaqatigiinnut ineriartortitseqataanissaannik qulakkeerinnittussaq, atuutsilerpaa. Suliassaqarfiit sisamat ukuusut immikkut pingaartitarineqarput: Ilinniartitaaneq, peqqissuseq, innuttaasunik peqataatitsineq piorsarsimassuserlu.
Tusassi suliffeqarfittut inuiaqatigiinnit pigineqartutut inissisimagami, inuiaqatigiinnut annerusumik utertitserusuppoq, suliffeqarfimmi siulersuisut siulittaasuat, Bodil Marie Damgaard, tusagassiuutinut nalunaarummi oqarpoq.
- Suliffeqarfiugatta inuiaqatigiinnit pigineqartoq pitsaasumik ineriartornissamut tapersiinissarput akisussaaffigaarput. Taamaattumik tapersiisarnermut politikkerput allanngortipparput, taamaalilluta inuiaqatigiinni malunnaatilimmik allanngueqataasut pitsaanerusumik suleqatigisarniassagatsigit, taanna oqarpoq.
Kalallit Nunaanni ineriartortitseqataaneq
Tusassip politikkia nutaaq tunngavigalugu ukiumut 2 millionit koruuninik aningaasaliissutissanik immikkoortitsisassaaq. 100.000 koruuniniit 1 millionit koruunit tungaannut qinnuteqartoqarsinnaavoq, aamma piffissami sivisunerusumi suleqatigiinnissaq periarfissaavoq.
Aningaasaleeqataanissamut politikki nutaaq inuppassuarnut qinnuteqarnerusulersitsinissaa Bodil Marie Damgaardip neriuutigaa.
- Suliniutit isumassarsisitsisut, ataatsimoortitsisut neriuuteqalersitsisullu tapersersussallugit takorloorparput. Taamaammat suliassaqarfinnut sisamanut tunngatillugu suliaqartut tamarmik qinnuteqarnissaannik kaammattuerusungaarpunga, taanna oqarpoq.
Suliniutit Kalaallit Nunaanni piffissap sivikitsup sivisunerusulluunniit ingerlanerani ineriartorluartitseqataasinnaasut tapersersueqataaffiginissaat siunertaralugu, suliniuteqarfiusunik taakkuninnga sisamaasunik toqqaasoqarpoq.
Ilinniartitaanermut tunngatillugu digitalimik ilinniarnermik teknologiikkullu nutaaliornermik siuarsaanermut suliniutit ilaatigut pineqarput.
Peqqissutsimut tunngasut eqqarsaatigalugit suliniutit peqqinnartunik eqeersimaarpalaartumillu inuiaqatigiinnut ataatsimoorfiusut pingaartinneqarput.
Inuuniarnikkut ajornartorsiortut nukittorsarumallugit inuiaqatigiillu ataqatigiinnerulersinniarlugit iliuuseqarneq, innuttaasunik peqataanerulersitsiniarnermut ilaapput.
Piorsarsimassutsimut tunngatillugu suliniutit piorsarsimassutsikkut kingornussarsianik kinaassutsimillu pingaartitsinermik tunngassutillit pingaarnersiorneqassapput.
Qarasaasiatigut qinnuteqartoqassaaq
Qinnuteqartut periarfissinneqassagunik suliniaqatigiiffiussapput aningaasarsiutiginagu suliaqartut, politikkikkut sulialinnut attuumassuteqartuussanngillat, pisortat suliffeqarfianneersuussapput imaluunniit pisortat immikkoortortaaneersuussallutik.
Tamatuma saniatigut misilittagaqartuunerup aningaasatigullu tunngavissaqarluarnerup uppernarsarneqarnissai piumasaqaataavoq.
Pilersaarutit tamarmik inuiaqatigiinnut sunniutissai tunngavigalugit nalilersorneqarumaarput aamma kikkut sullinneqarniarneri erseqqissuussaaq, suliniut nassuiarneqarluassaaq nassiussisorlu tatiginartuussalluni.
Aappaagumut aningaasaliissutinnanniaraanni Tusassip nittartagaatigut digitalimik kingusinnerpaamik januaarip 31-anni 2026-mi qinnuteqartoqassaaq. Suliniutit aningaasaliissutinnattussat marsimi 2026-mi tamanut saqqummiunneqassapput.
