Nunatsinni Nipilersortartut: Tusarnaartitsinermit akissarsiat akileraarutigineqartariaqanngillat
Nunatsinni nipilersortartuuneq imminut akilersinnaasariaqarpoq.
Tusarnaartitsinissamut piareersarneq annertusarpoq - piareersarnerlu akissarsiaqaatigineqarneq-ajorluni - taamaammat tusarnaartitsinermi akissarsiat akileraarutigineqartariaqanngillat.
Nipilersortartut kattuffiat Nunatsinni Nipilersortartut taama isumaqarpoq, AG taama allaaserisaqarpoq.
Piareersarnerujussuusartoq
Nunatsinni nipilersortartut ilaat suliaqarluartoq tassaavoq erinarsortartoq isiginnaartitsisartorlu Miké Fencker Thomsen. Taassuma suliffini uagut arfineq-pingasunit sisamanut sulisarnitsinnit allaanerusoq oqaatigaa.
- Assersuutigisinnaavara nipilersortartutut inuuneq imaakkami: saqqummertarpugut unnuk ataaseq, unnuit marluk. Kisianni unnunnut taakkununnga sungiusartarpugut, Mike Fencker Thomsen tusarnaartitsinerit sulissutigineqartupilussuusarnerat pillugu oqarpoq.
Ataatsimiititaliaq akuersaarpaluttoq
AG naapertorlugu, nipilersortartut kattuffiata kultureqarnermut naalakkersuisoq Doris J. Jensen ataatsimeeqatigisimavaa, taannalu ajornartorsiutaasup misissuiffiginissaanut suleqatigiissitamik pilersitsiniarpoq.
Inatsisartulli kultureqarnermut ataatsimiititaliaanni siulittaasoq Mimi Karlsen aamma akuersaarpaluppoq:
- Arlaatigut akileraarutit allanngornerisigut, akileraarutikinnerulernikkut periarfissanik ujartueqataajumavugut, Mimi Karlsen oqarpoq.
AAMMA ATUARUK Grønlands Musikerforening: Ret op på musikernes løn
Akileraartarusuttoq
Miké Fencker Thomsenip suliffeqarfiutimi akileraarutissaata naatsorsornissaat ajornartorsiutigisimavaa, tamannalu pissutigalugu akileraarutinut akiliutit ikinaarutaannik akiliisitaasimalluni.
Akileraarnissani ajorinngikkaluarpaa:
- Uanga akileraartarusuppunga. Pissutigalugu, qaqugukkulluunniit nakorsiartarfiliarsinnaarusukkama, qaqugukkulluunniit kigutileriffiliarsinnaarusukkama. Meeqqat atuarfii akeqanngitsut soorlu tamakkua pillugit, Mike Fencker Thomsen oqarpoq.
Akissarsiakitsut
Nipilersortartut isertitarisartagaat tusarnaartitsininngaanneernerujussuusartut, nipilersortartut kattuffianni, Nunatsinni Nipilersortartut siulittaasuat Inunnguaq Petrussen Qanoruumut ilaatigut oqarpoq.
Petrussenilu naapertorlugu tusarnaartitsinerit isertitsissutaavallaarneq ajorput.
- Akissarsiarisartakkagut annertunngimmata, soorlu bandimut sisamaalluta 10.000-innassimagutta, taakkulu sisamanngorlugit agguarutsigit akileraarlutalu, taava 1.450 koruuni sinnerussaaq. Taakkuuppullu sungiusarnerpassuit, atortorissaarutit pisiagut, assartuinerit
atortunillu ikkussuinermut atortussat. Tassa tiimerparujussuupput, akissarsissutigineq ajukkagut, Inunnguaq Petrussen Qanoruumut taama oqarpoq.
Apersuineq ataani takusinnaavat.
AAMMA ATUARUK Nipilersortartut angalanermut tapiissutinik qinnuteqarsinnaalersut