Tusarliisartoq: USA-p Irakimi aallartitaqarfia rakettinik eqqorneqarpoq

USA-p Irakimi illoqarfiit pingaarnersaanni Bagdadimi aallartitaqarfia rakettinik pingasunik sapaammi eqqorneqarpoq.

Irakimi isumannaallisaaniat taama nalunaaruteqartut, nutaarsiassaqartitsiviup AFP-ip allaaseraa.

Inuk ataaseq saassussinermi aqqunartitertoq nalunaarutigineqarpoq. USA-llu aallartitaqarfia Irakimi oqartussanit illersorneqartariaqartoq, saassussisoqareernerup kingorna USA-p kaammattuutigaa.

AAMMA ATUARUK Pompeop Irakimi sakkutooqarfimminnut saassusseqqittoqarnera assuarigaa

USA-p Irakimi aallartitaqarfia qaammatini kingullerni arlaleriarluni saassunneqarpoq, aallartitaqarfilli toqqaannartumik aatsaat eqqorneqarluni.

Bagdadimi illoqarfiup ilaa immikkut isumannaallisagaq, Iranimiut sakkutuuisa naalagaata Qassem Soleimanip USA-mit toqutaanerata kingorna qaammatip kingulliup ingerlanerani saassunneqaqattaarpoq.

USA-p sakkutuuisa Irakimit angerlartinneqarnissaat kingorna kaammattuutigineqarpoq, Irakip inatsisartuinit tamanna ilaatigut kaammattuutigineqarluni.