Tusarfik: Trump-ip Iranimut saassussinissamut pilersaarut akuerivaa
USA-p præsidentiata, Donald Trumpip, marlunngornermi siunnersortini qullersat peqatigalugit Iranimut saassussinissamik pilersaarut akuerivaa, kisianni saassussinissamik nalunaaruteqarnissamut aalajangiinnginnermini Iranip atomimik suliaqarnissaminik unitsitsinissaa utaqqivaa.
Tusarfiit taaneqanngitsut ilisimasaqarluartut nutaarsiassaqartitsivimmut Wall Street Journalimut oqaluttuarput.
Ulluni tulliuttuni saassussinissamik peratarsinnaasumik piareersaasoqartoq, saassussinissamik pilersaarummik sapaatip akunnerata naanerani pisinnaasussamik tusarfiit arlallit tikkuarput, tusarfiit taaneqanngitsut nutaarsiassaqartitsivimmut Bloomberg-imut taama oqaluttuarput.
Pisup ingerlarnga ingerlaavartumik allanngorarsinnaavoq, Tusarfiit Bloomberg-imut taama oqaluttuarput.
Saassussisoqaratarsinnaaneranik ersarissumik akissutissaqanngilaq
Aaqqiagiinnginnermut tunngatillugu oqallinnermi, marlunngornermi pingasunngornermilu USA-mi præsidentip Nunami Nakkutilliinermut Siunnersuisoqatigiinnik ataatsimiisitsivoq.
USA-p Iranip atomimik suliaqarfinnut saassussinissani pillugu, tamanna Trumpip toqqaannartumik akissuteqarfiginngilaa.
– Taamatut oqarsinnaanngilanga. Immaqa taamaaliussaanga, immaqa taamaaliussanngilanga. Qanoq iliuuseqarniarninnik kinaaluunniit ilisimasaqanngilaq, Trump Nutaarsiassaqaritsivik BBC naapertorlugu taama oqarpoq.
– Kisiannimi ima oqarsinnaavunga: Iran ajornartorsiutinik annertuunik nalaataqarpoq isumaqatigiissuteqarnissamillu kissaatigisaqarluni, taanna nangilluni oqarpoq.
USA-p sakkutuui ulluni kingullerni kangianut qiterlermut sakkutuunik amerlanerusunik aallartinneqarput.
Iran USA-mut akulerunniaqqusinani mianersoqquivoq
Wall Street Journal naapertorlugu imartap akullerup kujasissuani (Middelhavet) umiarsuaq sorsuut Destroyer-i ingerlaarpoq, taassumalu saniatigut umiarsuit mittarfittallit arlallit Arabiski Imartamut ingerlaarlutik.
Amerikamiut sakkutuui illersorniarlutik inississulersut, USA-p illersornissamut ministeria, Pete Hegseth, sapaatip akunnerani kingullermi oqarpoq.
– Eqqisseqatigiinnissamik isumaqatigiittoqarnissaanut anguniagaqarnitsinni, sumiiffiup immikkoortuani illersorniarluta inissisimavungut, isumaqatigiissuteqartoqarnissaa neriuutigaarput, Hegseth ataatsimiinnermi Fox News-imut tallimanngornermi oqarpoq.
USA Israelip Iranillu sorsuunnerannut akulerunniarneranut, Iranimi aqutsisuni qaffasinnerpaamik inissisimasoq, Ayatollah Ali Khamenei mianersoqusivoq. USAp ilisimasariaqarpaa Iran tunniutiinnarnavianngitsoq, Khamenei pingasunngornermi oqarpoq.
USA-p saassussineri tamarmik ajorluinnartumik kinguneqassasut taanna naqissusiivoq – Iran eqqissinermut imaluunniit sorsunnissamut pinngitsaalillugu akuersitinneqarsinnaanngitsoq, taanna nangilluni oqarpoq.
Maannamut USA sorsunnermut toqqaannanngitsumik akulerutereerpoq, tassa misiilit Israelimut aallartinneqartut nakkartittarsimammagit.
