Tusakkatit tamaasa upperiniaqinagit
Facebookimi ikinngutit allappat Hong Kongimut nuulerluni, taava tamatumunnga qanoq akissuteqassanerlutit ullumikkorpiaq mianersuuttariaqassavat. Oqaluttuat eqqunngitsut inuit attaveqaqatigiittarfiini imaaginnavipput, taamatuttaaq aviisini tusagassiorfinnullu nalunaarutini.
Ilaatigut Ekstra Bladet allappoq Storebæltsbroen Goldman Sachsimit pisiarineqartussanngortoq, Politiken oqaluttuarpoq Danmark VM-imut peqataasussanngortoq Grækenland peqataatitsinissaminut akissarulluni sussaaginnartariaqarsimammat. Danmarkimi Aalisagaarniat peqatigiiffiat, Danmarks Fiskehandlere, allappoq danskit saanilunnik danskit imartaanniittunik nerisassaqalersut.
Jobindex quianartuliorniarluni atorfimmik inuttarsassiuussinermik eqqunngitsumik saqqummiussaqarpoq, Uumasuusivissuaq Københavnimiittoq pilerisaarinermi pisortassarsiortoq nersunik toqoraasartutut misilittagalimmik, qungasersuup liivillu amii taskiliaralugit nioqqutissiarineqartussanngormata. Taamaaliortoqarneralu Uumasuusivissuup tungaanit nuannarineqanngilaq, Jobindexilu peqqusimavaa allagarsiuussaq peeqqullugu.
EU-kommissioni aamma salloqittaavoq, tassanngaanniimmi oqaluttuarineqarmat europamiut ataatsimoorussamik alfabeteqalertussanngortut, qarasaasiani naqitassat assigiissaarneqarsinnaasunngorlugit. Tamatuma malitsigisaanik tuluit oqaasiat they're siunissami danskit naqinnerannik æ-mik allanneqartalissaaq thær-inngorlugu, ajoraluartumilli å atorunnaarsinneqassasoq aamma nalunaarutigineqarpoq. Tamannali Aalborgimi nuannaarutigineqassagunarpoq, Aalborgip kukkusumik allanneqartarnera siunissami pinngitsoortinneqarsinnaassammat, kommissionimi danskit allaffeqarfianni tusagassiinermut pisortaq taama nalunaarpoq.
Maanilu KNR-imi pisortaanerup sulisut nalunaarfigai illumi oquttoortoqaqqinnera pissutigalugu sulisut nutseqqittariaqalersut. Tamannali qujanartumik upperineqanngilaq.
