Tusagassiuutinut tapiissutinik aaqqissuussineq nutaaq GE-p mianersoqqussutigigaa
Nunatsinni arlaannaannulluunniit attuumassuseqanngitsunik isorinnittunillu nutaarsiassaqartitsiveqartitsisoqarusunngitsoq oqarluaannartoqarsinnaavoq, Sulisitsisunit, GE-mit, taama allaaserinnittoqarpoq.
Tusagassiuutinut tapiissutit suliamit suliamut tapiissutigineqartussaapput, ilaatigut tusagassiuutit naqitat siuarsarnissaat tunngavilersuutigineqarluni.
Taama aaqqissuussineq tusagassiuutinut amerlanernut aamma periarfissiissasoq, soorlu aamma tunngavilersuutigineqartoq.
AAMMA ATUARUK Tusagassiiviup tapiissutit narrugigai
Tapiissutisinissamulli piumasaqaatigitinneqartut pissutigalugit ikittuinnaat tapiissutisisalissasut, Sulisitsisut isumaqarput.
Nuna tamakkerlugu saqqummersitsisinnaanissaq tapiissutisinissamut piumasaqaatit ilagivaat.
Sinerissamili innuttaasut tamarmik internetikkut assigiimmik attaveqarsinnaanngillat, tamannalu qinnuteqartut amerlasuut aporfigissagaat, Sulisitsisut isumaqarput.
Aamma tapiissutit siaruarterneqarnerinik tamanna kingunerussangatinneqarpoq, taamaasillunilu aningaasat tusagassiuutinut naqitanut ikinnerulissasut, siunissamilu matuinnartariaqassasut, Sulisitsisut ernumassutigaat.
Taamaattoqassappallu Nunatsinni nuna tamakkerlugu saqqummertartumik misissuisunik isorinnittunillu tusagassiortoqarunnaassasoq, Sulisitsisut aarlerisaaripput.