Tusagassiiviup tapiissutit narrugigai
Tusagassiiviup aningaasaqarnini pitsaavallaanngitsoq oqaatigigaluarlugu tapiissuteqartarnermik aaqqissuussinermut 2 millionit koruuninik aningaasaateqartumut qinnuteqaateqarnissani soqutiginnginnerarpaa.
Aaqqissuussinermummi aningaasanik qinnuteqaateqassagaanni, qinnuteqaateqartoq suliniutinut tigussaasunut qinnuteqartussaavoq, qinnuteqaallu ataatsimiititaliamit aningaasanik agguaassisartumit naliliiffigineqartussaalluni.
- Tusagassiivittut pituttugaanngitsutut akuersaarsinnaanngilarput iluarisanik naliliisartoqarnissaa aalajangerlugulu tusagassiuuteqarnikkut suliniutivut eqqortuunersut kukkusuunersulluunniit, Atuagagdliutini aaqqissuisuuneq, Christian Schultz-Lorentzen, aviisimut taama oqarpoq.
AAMMA ATUARUK Nivi Olsen: Sinneqartoorutillit tapiissutisisassanngillat
Suliniutinullu tapiissuteqartarnermik aaqqissuussineq Nunatsinni tusagassiuutit atugaannut piviusunut naapertuutinngitsoq, aaqqissuisuunerup aamma oqaatigaa.
- Aaqqissuussineq una pissutsinut piviusunut ungaseqaaq. Naalakkersuisut tusagassiuutinik aqutserusunnerannut takussutissaavoq, Christian Schultz-Lorentzen oqarpoq.
Nunatsinni aviisit naqitat nunani killerni aviisinut allanut naleqqiullutik ataannarniarlutik ilungersoreersut aamma erseqqissaatigaa. Ilaatigut siammarterinermut oqaatsinillu nutserinermut aningaasartuutit amerlanerujussuupput aningaasartuutillu matussuserneqarnissaannut ussassaarutit ikinneerarsuullutik.
- Pissutsit nuannaartunartut silarsuaanni aviisit taperneqartariaqanngikkaluarput. Taamatuttaarlu naalakkersuinikkut partiinut. Ilaasortat akiliutaannit aningaasalersorneqartussaagaluarput. Silarsuarmili pissutsit taamaanngillat, Christian Schultz-Lorentzen taama isumaqarpoq.
AAMMA ATUARUK Demokraatineersoq Nivi Olsenip tusagassiuutit pillugit saqqummiussaa pillugu: Sianiitsuliornerulluinnarpoq