Tusagassiuteqarneq pillugu nalunaarusiortut: Aningaasanik suli amerlanernik!

Nunatsinni nutaarsiassaqartitsiviit pisussaaffitsit tamakkerlugu sulinngillat aningaasakilliorneq ilaatigut tamatumunnga pissutaalluni, Tusagassiuteqarneq pillugu nalunaarusiami ilaatigut taama siulequtsiussaqarpoq.

Tamannalu pillugu nunanut allanut sanilliulluta kinguussaaqqavugut. Tamatumalu kingunerisinnaava Nunatsinni demokratiip innarlerneqarnera.

Taama isumaqartut tassaapput nalunaarusiamik suliaqartut tusagassiorfinneernerusullu arfineq pingasuusut. Ilaatigut KNR-ip pisortaa, Ivalo Egede, Sermitsiap aaqqissuisuunera, Poul Krarup, Tusagassiortut Peqatigiiffianni siulitaasoq, Mariia Simonsen aamma Tusagassiortunngorniat ilinniarfianni pisortaq Naja Paulsen.

- Nunarput demokratiskiusumik aqunneqarpoq taamatullu isigineqarusulluta. Inuit aalajangeeqataasinnaassagunik tusagassiorfigineqartariaqarput tusagassiorfinnit kiffaanngissuseqartunit ullumikkornillu periarfigissaarnerusunit. Tassami tusagassiorfinni sulisut ullumikkut ikiligaluttuinnarput, tamatumunngalu pissutaavoq iluamik akissaqartinneqannginnamik, Mariia Simonsen oqarpoq.

Nunatsinni tusagassaqartitsinerup pitsanngorsarneqarnissaa anguniarlugu nalunaarusiamik suliaqartut politikerit suliassippaat aaqqitassanik amerlagaatsiartunik. Aaqqitassallu pingaarnersaattut taaneqarsinnaavoq qarasaasiatigut atuinermi akit appartinneqarnissaat:

- Internettep akisunerujussua iluarsiiffigineqartariaqarpoq, tassami suli taassuminnga atuineq akikinnerujussuusinnaagaluarpoq. Meeqqat inuusuttullu internettemik atuineri ullunikkut annertoorujussuuvoq, ajoraluartumilli nunat allamiut oqaasii tassani atorneqarlutik. Uagullu isumaqarpugut internette kalaallisut aamma immertariaqartoq. Taakkulu kalaallisut ineriartortinneqassagunik aningaasanik atuiffigineqartariaqarput, Mariia Simonsen oqarpoq.

Pisariaqarsorineqartoq pitsanngorsarneqartussatullu taaneqartoq tassaavoq nuna tamakkerlugu aviisi normu 2, taannalu pisortanit aningaasalersorneqassasoq siunnersuutigineqarluni aammalu naqiterivik print-on-demandimik taaneqartartoq atorlugu taanna siammartinneqartassasoq innersuussutigineqarluni.

KNR aningaasanik amerlanernik pisariarqartitsisoq aamma oqaatigineqarpoq aammalu siunnersuutigineqarluni KNR namminersortunngortinneqassasoq "erhvervsdrivende fond"-imit pigineqartoq.

Taakku taaneqartut saniatigut nalunaarusiamik suliaqartut siunnesuutigineqartut qanoq aningaasartuutaatiginissaat eqqarsaatigalugu naatsorsuisimanngillat siunnersuutimi qanoq aningaasartaqartigineri eqqarsaatigalugit. Naatsorsuisimannginnerallu najoqqutaralugu siunnersuutaat qanoq piviusorsiortuutiginersut apeqqutigaarput:

- Suliassinneqarnerput naapertorlugu tikkuaavugut periarfissaasinnaasunik, taamaattumik uangut nalilertussaanngilarput nalunaarusiarput piviusorsiortuunersoq. Tusagassiutinik nukittuunik peqarneriaanni qanoq akeqarnissaat, periarfissaqartitaanitta iluani missigersukannerpavut, oqarsinnaavugullu aningaasarpassuit atorneqartariaqartut. Tassa tulleriiaarisussat tassaapput uangutsinnut suliakkiisut tassalu Naalakkersuisut, Mariia Simonsen oqarpoq.

Qanormi Naalakkersuisut oqarpat? Mimi Karlsen aperineqarpoq.

- Isumaqarpunga siunnersuutigineqartut soqutiginartorpassuusut aammalu pingaarutilippassuarnik nalunaarusiortut saqqummiisut. Politikkut pilersaarusiornitsinni tamakku siunnersuutaasut sakkusaqqissorujussuupput atorneqarluarsinnaallutillu, Mimi Karlsen oqarpoq. Taassuma ilanngullugu oqaatigaa Tusagassiuteqarneq pillugu nalunaarusiap inuiaqatigiinnit qanoq pisariaqartinneqartiginera naapertorlugu taakku piumasaat aamma isummersorfigineqarumaartut.

Tusagassiuutit pillugit suleqatigiissitat nassuiaataat uani atuarneqarsinnaavoq (eqikkagaq aamma nassuiaat tamakkerlugu): knr.gl/tusagassiuutit