Tusagassiuinermi Sulisut Peqatigiiffiat KNR-ip ilungersuanera pillugu: Politikerit tusagassiuuteqarnermut sumiginnaapput
KNR-ip kalaallinik tusagassiortussarsiniarnerata ajornartorsiutaajuarnera pissutigalugu ukioq nutaarsiassat ikilisinneqaqqanerata sivitsoqqinneqarneranik aallartippoq.
Tusagassiuinermi Sulisut Peqatigiiffiat, TP maanna qisuariaateqarpoq. Peqatigiiffik tusagassiuutinut nalunaaruteqarnermini naalakkersuisunut isornartorsiuivoq.
- Nunatsinni isorartoqisumi innuttaasut nutaarsiassanik suliarilluakkanik apeqqusiisinnaassusilinnillu ulluinnarsiuteqartussaagaluartut eqqugaapput. Inuiaqatigiinni pissaanerit sisamaattut taaneqartartoq nukillaaraluttuinnarpoq, KNR-illu inuiaqatigiinnut pisussaaffini kivissinnaajunnaarpaa, TP allappoq.
Radioaviisimi kalaallit tusagassiortut tallimat amigaatigineqarput, maannakkullu aalajangersimasumik atorfeqartut marluinnaapput.
Imaapporlu ullup-qeqqanut radioaviisi unnukkut arfinermut aallakaateqqinneqartarpoq, knr.gl-imi nutaarsiassat amerlassusaat ikinnerupput, Qanoroorlu qaammatini marlunni aggersuni minutsinik 15-iinnarnik sivisussuseqartassalluni.
- Ataasiinnarluunniit peeraluarpat ajunaarnersuartut ittumik pisoqassaaq. Nutaarsiassaqartitsivik pineqartoq nunatsinni upalungaarsimanermi pingaarutilittut inissisimasoq ikiorfeerutilerpoq, TP allappoq.
Tusagassiuutinik sumiginnaaneq
Tusagassiuinermi Sulisut Peqatigiiffiata KNR-imi ajornartorsiutit politikerit tungaanniit sumiginnaanerunerarpai.
Peter Olsenip naalakkersuisutut upernaaq Inatsisartuni oqallinnermi tunuarnera pissutigalugu suliap sukumiinerusumik ukkatarineqalernissaanik kinguneqassasoq peqatigiiffiup neriuutigisimagaluarpaa.
Naalakkersuisuusimasulli neriorsuutigisimasaa suleqatigiissitaq suli takuneqanngilaq.
- Nunami namminersulivinnissamik siunnerfeqartumi tusagassiortut apeqqusiisinnaasut paasissutissiisinnaasullu aatsaat taama pingaaruteqartigipput, TP allappoq.
Akissarsiaqartitsisoqarnerussasoq
Amerlasoorpassuariarlugu oqaatigineqareersutut kalaallinik tusagassiortunik pilerisaarinissamut attassiinnarnissamullu akissarsiat pitsaanerunissaat pisariaqarpoq.
TP-p tamanna aaqqiissutissatut aamma oqaatigaa. Pingaartumik KNR-imi tusagassiortutut sulisut Namminersorlutik Oqartussanilu attaveqaqatigiinnermut sulisut akissarsiaat nikingangaatsiartut takuneqarsinnaavoq.
- Ajornartoorneq ulluinnarsiutigilissallugu akuersaarneqarsinnaanngilaq. Akissarsiat sulinermilu atukkat pillugit isumaqatigiinniarnerit qaammatialuinnaat qaangiuppata pisussaapput. Tusagassiortut akissarsiaqarnerusariaqarput, TP-p siulittaasua, Arnaq Nielsen tusagassiuutinut nalunaarummi oqarpoq, nangillunilu:
- Naalakkersuisut Inatsisartunullu ilaasortat: Tamat oqartussaaqataanerat illersorneqarlunilu apeqqusiisinnaasunik paasissutissiisinnaasunillu tusagassiortoqassappat ilissi aamma pisariaqartippatsigit.