Tusagassiuut: Bruxellesimi metromi inuit qulit toqutaapput
Bruxellesimi qimuttuitsut nunap iluatigoortut unittarfiat, metro, EU-p sullissiviisa eqqannguaniittoq timmisartoqarfissuup qaartartumeerneqarnerata kingorna qaartartumeerneqarmat inuit arlallit toqutaasimanerat allallu ikiligaasimanerat Belgiami tusagassiorfinnit nalunaarutigineqarpoq.
Belgiami tv-qarfiup VTM-ip nalunaarutigaa Bruxellesimi qimuttuitsut nunap iluatigoortut unittarfianni qaartartumeerisoqarmat inuit qulit toqutaasut ikiligaasullu 15-iusut.
Qimuttuitsut nunap iluatigoortut unittarfianni inuit angallatileruttortut qaartitsineq pivoq - Bruxellesimi timmisartoqarfissuup saassunneqarnerata kinguninngua.
Tv-kkut takuneqarsinnaavoq qimuttuitsut nunap iluatigoortut unittarfiannit EU-Kommissionimit meterinik 100-nik qanitsigisumiittumit pujoq aniasoq.
Qimuttuitsut unittarfiata silataani aqqusinermi inuppassuit kiinaat aaginnaasut nalapput.
Bruxellesimi qaartartumeerisoqarnerata kingorna qimuttuitsut nunap iluatigoortut bussillu tamaasa angalatikkunnaarneqartut, nutaarsiassaqartitsivik Reuters allappoq.
Belgiami tv-qarfiup VRT-ip nalunaarutigaa Bruxellesimi timmisartoqarfissuarmi qaartartumeerisoqarnerani ikinnerpaamik inuit 13-it toqutaasimasut inuillu 35-t ikiligaallutik.
Aamma atuaruk Bruxellesip timmisartoqarfissuani saassussinermi toqutaasut arlaqartut
Belgiami tv-qarfik VRT naapertorlugu timmisartoqarfissuarmi imminut pilliutigaluni qaartartumeerisoqarsimavoq.
- Bruxellesip timmisartoqarfissuani qaartartumeerineq sioqqullugu aallaasinik eqqaassisoqarpoq arabiamiusullu nilliasoqarluni, Belgiamiut nutaarsiassaqartitsiviat Belga taama allappoq.
Bruxellesimi peqqarniisaarnianik tigusarinnittoqarnera pillugu ulluni kingullerni illoqarfik sammineqartupilussuuvoq.
Parisimi novembarip qaammataani ajortumeerisut ilaannik 24-nik ukiulimmik Najim Laachraouimik - imminut Soufiane Kayalimik taagortumik politiit ujaasinertik piffissami kingullermi annertusarsimavaat.
Taannalu Bruxellesip illoqarfiata ilaani tallimanngormat tigusarineqarpoq.
/ritzau/Reuters
