Bruxellesip timmisartoqarfissuani saassussinermi toqutaasut arlaqartut

Bruxellesip timmisartoqarfissuani marloriarluni qaartitsisoqarnerani toqutaasut arlaqartut Belgiami nutaarsiassaqartitsiviit Reuters naapertorlugu nalunaarutigaat.

Belgiami tv-qarfik VTR, Reuters naapertorlugu, ilisimatitsivoq Bruxellesip timmisartoqarfissuani qaartartumeerisoqarnerani inuit 13-it toqutaasimasut 35-llu ikiligaallutik.

Toqutaasut amerlassussaat pisortatigoortumik suli uppernarsarneqanngillat.

Belgiami tv-qarfik VRT naapertorlugu imminut pilliutigaluni qaartartumeerisoqarsimavoq.

- Bruxellesip timmisartoqarfissuani qaartartumeerineq sioqqullugu aallaasinik eqqaassisoqarpoq arabiamiusullu nilliasoqarluni, Belgiamiut nutaarsiassaqartitsiviat Belga taama allappoq.

Naalakkersuisuni tusarfiit ilaata tv-qarfimmut VRT-mut oqaatigaa "Bruxellesip timmisartoqarfissuani qaartartumeerinerit saassussinerusut".

Aviisi Standard allappoq inuit arlallit toqutaasimasutut nalunaarutigineqartut. Paasissutissat taakku, tv-qarfik VRT naapertorlugu, qatserisartunit pissarsiarineqarsimapput. Tusagassiorfiillu allat toqutaasut 13-iunerarpaat.

Aviisi Belga allappoq Bruxellesip timmisartoqarfissuani qaartartumeerisoqarnerani ikinnerpaamik ataaseq toqutaasoq arlalissuillu ikiligaasimasut.

Takkunnittut Sky Newsimut oqaluttuarput "qaartartumeerinerit sakkortuupilussuusut."

- Illorsuaq sajuttoq malugaara. Suna tamarmi pujoralammik putsumillu iseriattuinnaavoq. Inuppassuit quarsaaqqaqalutik saaffissaaruppasipput, takunnittoq oqaluttuarpoq.

Timmisartoqarfissuup aallartarfittaani marloriarluni qaartitsisoqartoq, Belgiami nutaarsiassaqartitsiviit allapput. Illorsuarmit pujoq aniasoq takuneqarsinnaavoq.

Timmisartoqarfissuup illoqarfiullu akornanni qimuttuitsunik angallanneq unitsinneqarsimavoq.

/ritzau/Reuters