Tupilappassuit Danmarkimi tillinneqarput
- Ilimagilluinnarpara tillinniat suna tillissallugu nalunngilluinnarsimagaat, tillitatillu qanoq akisutigisut, aamma mianersoqqissaassallutik ilisimasimassavaat, oqarsinnaagunarpunga tassaassasut inuuniutigalugu tillinniartartut, eqqumiitsulianik piginnittoq, Bjørn Wandall, Nordjyskemut oqarpoq.
Kalerrisaarut tillinniartoqarnerani aallartissimanngilaq, Nordjyskemilu allaaserineqartut naapertorlugit, nakkutilliiviup arajutsisimavaa kalerrisaarut arfininngornermi unnuakkut marlup-qeqqanulli qaminneqarsimasoq.
Tillinniarnermik Thistedip politeeqarfianiit misissuisup, Andreas Søgaardip, KNR-imut uppernarsarpaa, tillinniat tassaasinnaasut inuuniutigalugu tillinniartartut.
Politiit suli misissuipput, neriuutigaallu inuit tupilannik piseqqullugit neqeroorfigineqarsimasut politiinut kalerriiumaartut, kikkut tillinniarsimanersut paasineqarniassammat.
