Takunnittoq: Tupigusoqaanga amilaarnangaarmat

Jens Ole Jensenip apersorneqarnera qulaani tusarnaaruk

Qaqqarsuup sisoornerani takunneqqaartoq KNR-imiit oqaloqatigaarput. Uummannarmiu Jens Ole Jensen ilaquttanilu pinialukkiartorlutik umiatsiartillutik pissusissamisoortoqanngitsoq takulerpaat:

- Tassanngaanaq nipimik tusaasaqalerluta timmisartorpalukkasuariarlugulu aamma nuialluni qaqqat ilaat qulaa ersinnginnami taava takulerpara pujorujorujorujussuaq annertoorujorujorujorujorujuk, taava aappara oqarfigaara: takuuk annarsuaq, takunneqqqaartoq Jens Ole Jensen oqarpoq, nangillunilu:

- Taava paasilerakku tassa qaqqarsuaq nakkaartorsuaq tappavanngaaneerujorujuk qaqqaq portusoorujorujuugami taanna. Taava malugisinnaavara taama annertutigisorsuarmik nakkaartoq nuna pinngitsoorani malitseqassasoq.

Sekundiaqqanik sioqqutsiarlutik ajutuunngitsut

Jens Ole Jensenip aalisartoqatini radiukkut ingerlaannaq kalerrisaarpai. 

- Umiatsiaq qanitarput ataaseq sissaminngaanniit qujanartumik qimagussimavoq. Taakkua sekundiminiaqqanik sioqqutsilaarlutik ajutuunngillat.

Qanngorpallannersuup kingorna minutsit tallimat ingerlanerinnaani malissuaq takkuppoq.

- Malissuaq kangerluk ikerasassuaq tamaat tattoqittutut illugu aniartorpoq, qaartaqattaarlugu illuaniit illuanut, nunaq qarsuallugu. Oqaluttuariuminaaqaaq amiilaarnangaarami. 

Takusaq amiilaarnartoq

Aalisartoq piniartorlu inuussutissarsiornermini nalaataqarsimagaluaqaluni, pisumi uani aatsaat taama amiilaarnartigisumik takusaqarpoq.

- Inuuleramali nukik taama annertutigisoq aatsaat takulerakku tupigusoqaanga amilaarnangaarmat, Uummannarmiu Jens Ole Jensen oqarpoq.

Nuugaatsiaq eqqugaareerluni innuttaasui qimagutitinneqarput. Nunallu sisooqqissinnaanera aarlerisaarutaammat Illorsuarmiut Niaqornarmiullu aamma qimagutitinneqarput.

Saattuni, Ukkusissani, Ikerasammi Qaarsunnilu immap qanoq issusaa suli nakkutigineqassasoq, politiit nalunaarutigiuarsinnarpaat.