Tunup avannaarsuani qimusserlutik alapernaarsuisartut pillugit piviusulersaarummik filmiliortoqarnialerpoq
Filmiliassaq The Sledge Patrol-imik qulequtserneqarsimasumi piniartut kalaallit, qallunaat Norgemiullu sorsuunnersuup kingulliup nalaani nazistit tunup avannaarsuani silasiorfilioqqunagit alapernaarsuisalernissaannik suliakkerneqartut pillugit , filmiliortartoq namminersortoq Sandra Skibsted filmiliorusuppoq.
- Taamanimi pisimasut pillugit oqaluttuaq tupinnaannarpoq. Angutimmi taakku qimusserlutik alapernaarsuinerisa kingunerisaanik sorsuunnersuarmi kingullermi sorliit ajugaanerinut aaliangiisuulluinnarsimapput, tassami sorsuunnerup nalaani silap qanorinneranik ilisimasaqarnerpaajunissaq pingaaruteqartuartuummat, Sandra Skibsted oqarpq.
Taanna inuppassuarnik oqaloqateqarsimavoq, toqqorsivitoqqallu assaavigalugit filmimut atugassaminik paasissutissanik ujaasisimalluni. Asulu ujaasinermi nalaani qallunaaq piniartoq taamani sakkutuunngortinneqartoq, Eli Knudsenip taamani ullorsiutai ilisimaneqarpianngitsut siumorsimallugittaaq. Eli Knudsen tunup avannaarsuani iligiit sakkutuuini toqutaasortatuaavoq.
- Ilumut ullorsiuteqarsimasoq arlaannaataluunniit ilisimasimanngilaa. Ilami ullorsiutit, titartakkat allakkallu angutip taassuma allagarisimasai ilisimaneqanngitsut siumorakkit inuttaanik qanilleriapiloorinnittutut misinnarpoq.
Ukiut marluk matuma siorna aningaasaliisussarsiorlutilluni pilerisaarummik minutsinik qulingiluanik sivisussusilimmik promo-videoliorpoq iluatsitsinngitsoorlunili. Nunarsuatsinnilu tv-qarfippaaluit filmi piviusunngoriarpat aallakaatitsiumagaluarlutik arlaannaalluunniit aningaasaleeqataarusussimanngilaq. Allatullu ajornarmat internettimi katersuiniartunut nittartagaq Kickstarter, Simon Lyngep iluatsilluartumik atorsimasaa aqqutigalugu aningaasanik katersuiniaannalersimalluni.
- Imaanngilaq oqaluttuartaa pikkunaassorineqarmat aningaasaliisoqarumanngitsoq. Naallu Kickstarter-i siornatigut atorsimanngikkaluaringa taanna aqqutigalugu iluatsilluarsimasut nalunngeriarakku uanga aamma iluatsiffigisinnaasorigakku taanna aqqutiginiaannalerpara, Sandra Skibsted oqarpoq.
Kickstarter aqqutigalugu aningaasanik katersuiniarnissani septebarip ingerlanerani aallartissagaa Sandra Skibstedip naatsorsuutiginerarpaa.