Tunup avannaani alapernaarsuisussat piukkunnarsarput
Qimussimik alapernaarsuisut Sirius, nutaanik tallimanik taarserneqalerput. Taakkua juulip aallaqqaataaniit qaammatini 26-ni Tunup avannarpasinnerusortaani alapernaarsuissasut, Sakkutuut imarsiortut alapernaarsuisoqarfiat nalunaarpoq.
Allattoq Jaaku Lyberth
juunip 17-at 2009 06:19
Siriusikkunnut piukkunnarsartut arfineq marluk siorna novembarimi aallartikkamik, sakkut passunnissaat, pinialunneq, ikuallattumi putsumut pulatersinnaaneq, qaartiterinerlu pikkorissarfigaat. Tunulli avannaarsuani atisatik namminneq ilaartortartussaagamikkit, aallaqqaammut piareersaleramik mersornermut pikkorissarput. Piukkunarsartut sakkutuut arfineq marluk, februaarimi Mestersvigimi issittumiinneq misilerareeramikku, piukkunnarnerit tallimat maanna taarsiinissaminnut piareerput. Ukiup ingerlaneranut peqqumaatissatik, aasaanerani pajuttussamut nassiussassatik Aalborgimi ulluni makkuni poortorpaat. Marlukkaarlutik qimussimik alapernaarsuilertussat juulip 16-ianni Tunup avannarpasinnerusortaanukassapput.
