Tunumiut Avannaata Qimussersuini peqataassanngillat
Tunumi qimminut akiuussutissalersuisartunik amigaateqarneq Avannaata Qimussersuinik martsip 27-ni pisussamik eqquivoq.
Sukkaniuttarneq pisoqarfiusaqisoq pilersaarutit malillugit oqaluttuarisaanermut ilannguttussaagaluarpoq qimmeqarfinniit tamanit peqataaffigineqarluni.
Taamaattussaajunnaarporli.
AAMMA ATUARUK Nuna tamakkerlugu sukkaniutissamaaqqilerput
Qimmit Tasiilameersut qimmeqarnermut inatsit naapertorlugu suli akiuussutissalersorneqarsimanngillat.
Tamannarpiaq qimussertartut kattuffianni KNQK-mi siulersuisut sisamanngornermi unnukkut oqaluuseraat.
- KNQK-mi siulersuisut ataatsimiinnitsinni aalajangerpugut qimussertartut Tasiilap eqqaaneersut peqataasinnaassanngitsut qimmit akiuussutissalerneqarsimanngimmata, KNQK-mi siulittaasoq Johan Olsen KNR-mut oqarpoq.
- Qimmeqarnermut inatsimmi allassimareerpoq qimmit inatsisit malillugit akiuussutissalerneqarsimanngitsut inoqarfinnut allanukaateqqusaanngitsut, Johan Olsen oqarpoq.
Tuniluussinnaavoq
2017-mi januarip aallaqqaataanit inatsisitigut piumasaqaataalerpoq qimmit qimuttut tamarmik qimmit nappaataannut parvovirusimullu akiuussutissalerneqartassasut.
- Qimmit akiuussutisalerneqarsimanngitsut angalatinneqannginnissaannik KNQKp aalajangernera taperserparput. Tassami qimmit akiuussutisalerneqarsimanngitsut Kalaallit Nunaanni sumiiffimmut allamukaatissagaanni nappaammik nassataqarsinnaapput imaluunniit killormut nappaammik angerlaassillutik, nersutit nakorsaqarfianni pisortaq. Egill Steingrimsson oqarpoq.
1980-kkullumi naalerneranni Qaanaap eqqaani qimmit nappaalallutik nungungajaapput.
AAMMA ATUARUK Avannaani qimmit nappaataannik nappaalasoqartoq pasitsaanneqarpoq
Iluliarmiut allallu qimminik tunissuteqarput piniartut inuussutissarsiumminnik ingerlassinnarsinnaaqqullugit.
KNQK-mi siulersuisut nuannaarutigaat Avannaata Qimussersui Qaanaamut kujammut Sisimiut tikillugit peqaaffigisaannik pisussanngormat. Peqataasut qimussit 30-it sinneqalaassapput.
- Sukkaniunnissap qanorpiaq ingerlanissaa Ilulissani aaqqissuisut pilersaarusiorpaat, Johan Olsen naggasiivoq.
