Nuna tamakkerlugu sukkaniutissamaaqqilerput

Nuna tamakkerlugu qimussertartut sukkaniuteqqissinnaapput.

Qimussertartut kattuffiat KNQK maanna nakorsaaneqarfimmut qinnuteqarpoq nuna tamakkerlugu sukkaniunnissarsuup Avannaata Qimussersuisa pisinnaanissaanut.

Oqaluttuarisaanermi aatsaat avanersuarmiut tunumiullu peqataasoralugit sukkaniunneq pisoqarfiusaqisoq pisussanngorpoq.

- Siulersuisuni ippassaq ataatsimiinnermi aalajangerpugut Avannaata Qimussersuisa martsip 27-ni pinissaa nakorsaaneqarfimmut qinnuteqaatiginiarlugu, KNQK-mi siulittaasoq Johan Olsen KNRip Ilulissani tallimanngornermi ullaap tungaa naapimmani oqarpoq.

Inuit katersuussinnaanerannut killilersuinerit apriilip naaneranut sivitsorneqaraluarmata Avannaata Qimussersui taamaatiinnarneqaraluarpoq. Killilersuinermi kommunimit kommunimut allamut angalalluni aaqqissuussinernut peqataaqqusaannginneq ilaavoq.

Naalakkersuisulli timersornermut periarfisseeqqammerput. Malittarisassammi qasukkarneqarput.

Apriilimmi ulluisa 18-iata tungaanut kommunimit kommunimut angalalluni aaqqissuussinernut maanna peqataajartortoqarsinnaavoq.

KNQK: Sivisoorujussuarmik qungujulavugut

Peqqissutsimulli naalakkersuisoq Martha Abelsen ataasinngornermi tusagassiortunik katersortitsinermi nalunaarpoq kommunenit assigiinngitsuneersunik peqataasoqarlu aaqqissuussisoqarsinnaanngoqqittoq.

- Aaqqissuussinerit annertuut ammaateqqinneqarmata sivisoorujussuarmik qungujulavugut, Johan Olsen oqarpoq.

Avannaata Qimussersui arfininngorneq martsip 27-at Ilulissani pisussatut qinnutigineqarpoq, tassanilu qimussit 40-nit ikinnerulaartut peqataanissaat naatsorsuutigineqarpoq.

- Suli aalajangiunneqanngilaq ataatsikkut aallassanersut imaluunniit naafferarlutik aallartinneqassanersut. Tamanna aaqqissuussisussallu eqqartoqqittussaavarput, Johan Olsen oqarpoq.

Pissartanngorniunnermik aaqqissuussinermut piumasaqaatit

Naalakkersuisut nunatsinnut angalanermut killilersuineq apriilip ulluisa 18-iannut sivitsorpaat. Tassa imaappoq, oqartussanit akuerineqarsimasut kisimik, tassa inuit corona pillugu allattoqarfimmit akuerineqarsimasut kisimik, nunatsinnut isersinnaapput.

Naalakkersuisummi coronavirusi ingammik coronavirusit ilaat Tuluit Nunaanneersoq Danmarkimilu tuniluutileruttortoq nunatsinni siaruatsaalerusullugu taamaaliorput. Coronavirusit ilaat Tuluit Nunaanneersoq coronavirusimit tuniluutileqqaartumit tuniluutianeruvoq.

Corona pillugu killilersuinernik qasukkaaneq killilimmik piffissaligaasoq, Naalakkersuisut oqarput.

Tassa imaappoq, Naalakkersuisut nunatsinnut angalaneq apriilip ulluisa 18-iata kingorna ammaqqikkunikku killilersueqqilissapput. Naalakkersuisulli qanoq sukannertigisumik killilersuinissartik apriilip ulluisa 18-iata qallinerani aatsaat aalajangerniarpaat.

Nunatsinni pissartanngorniutsitsinermut piumasaqaatit tallimaapput:

Illoqarfinni ukunaniinnaq aaqqissuussisoqarsinnaavoq: 

• Ilulissat, Aasiaat, Qasiannguit, Qeqertarsuaq, Kangerlussuaq, Maniitsoq, Sisimiut, Nuuk, Paamiut, Narsaq, Narsarsuaq aamma Qaqortoq. 
• Aaqqissuussisoqarnissaanut ullut 30-t sioqqullugit illoqarfimmi aaqqissuussiffiusussami tunillatsissimasumik uppernarsaasoqarsimassanngilaq.
• Aaqqissuussineq 50-init amerlanerusunit peqataaffiussappat tamanna Nakorsaaneqarfimmit akuerineqaqqaassaaq. Isiginnaartussat naatsorsorneqartunut ilaassapput.
• Tamatuma saniatigut aaqqissuussisoqarnissaanut ullut 14-it kingulliit iluanni tikittut peqataqqusaanngillat. Inuit ullut 14-it kingulliit iluanni tikittumut qanillisimasut aamma peqataaqqusaanngillat.
• Illoqarfimmi aaqqissuuffiusumi tunillatsissimasumik naammattuuisoqarpat aaqqissuussinermut peqataasut namminneq kommunerisaminnut aallartinnatik coronamik tunillatsissimannginnermut uppernarsarneqaqqaassapput.