Tunumi tikaagullittassat amerlineqartut
Nunatta sinnerani pisassiissutit nikinngillat Tunumili tikaagullittassat aqqaneq marlunnit 20-nut amerlineqarput.
Umiatsiaaqqat ikinnerpaamik tallimat tikaagullinniaqatigiiittartut piniagassaat amerlanerulissammata tusarluarneqarpoq:
- Tunumi pisassiissutit amerlineqarnerat malunniuteqassaaq, tamannalu nunaqarfimmiunit nuannaarutigineqassaaq, neriuppunga aamma tamarmik iluaqutigissagaat, Kulusumi piniartoq, Putso Kuitse oqarpoq.
Tikaagulliit pisassiissutigineqartut aqqaneq marluugallarmata aasaanera silaqqitsillugu tamakkerneqajaartarput, puisillu akuttornerisa nalaanni avasissumi tikaagullinniartoqartarluni.
Tunumi umiatsiaaqqat arlaliullutik tikaagullinniartillugit pisarineqartut agguaanneqartarput tunisiartortoqartarlunilu, pisassiissutillu amerlineqarnerat inuussutissarsiornermut ilaqutaassaasoq, Putso Kuitse oqarpoq.
- Tamanut iluaqutaasuaannarpoq, piniartullu pisaqartoqaraangamik nunaqqatiminnut agguaasarput, pisallu ilai Tasiilamut tuniniarneqartarlutik, tikaagullitoqartillugumi nutaartugassanik agguaasoqartarpoq mamarineqarluartama, pisassiissutit amerlaneqarneranut isumalluartoq, Kulusumi piniartoq, Putso Kuitse oqarpoq.
PISASSIISSUTIT MAANNA ATUUTTUT:
Atlantikup avannaata Qeqqani, Tunumilu: 20 / siornatigut 12
Nunatta kitaani tikaagulliit: 164
Kitaani: 19
Kitaani arferit 2
Kitaani qipoqqaat 10
Nunat Tamat akornanni Arfanniarnermut Ataatsimiititaliarsuarmi arfattassat nutaat pillugit pingasunngormat akuersissutigineqarput.
Taasinermi 58-it akuersipput, arfineq marluk itigartitsisut, pingasullu taaseqataanatik.
Kalaallit Nunaannit pasissiissutissatut kissaatit IWC-p Ilisimatuussutsikkut Ataatsimiititaliaanut ukiormanna apriilimi maajimilu saqqummiunneqarput. Nunap inoqqaavisa arfanniarneranut atuuttussamik siunnersuut tamanut atuuttussaq ataatsimiinnermi saqqummiunneqarpoq.
