Tunumi piniartut ilisimatuunit tikeraarneqarput
Misissugassarsiornerat manna tikillugu iluatsilluarpoq. Ilisimatuut nannunit pingasunit misissugassaminnik pitsaalluinnartunik ilanngaasimapput. Aarhusip universitetiani DMU-mi professori Rune Dietz bloggimini taamatut allappoq. Sapaatip akunnerisa pingasut ingerlaneranni nannut qulit misissugassaminnik ilanngaaffiginissaat siunertaraat.
Ilisimatuut 13-it Illoqqortoormiut kujataani Uunartumi inissisimapput. Tuluit filmiliorfianniit Windfall Filmsimiit Danmarkimilu DK4-miit pinngortitamik assiliisartoq Steen Andersen angalaqataapput.
Piniartut marluk ataatsikkungajak tallimanngormat nannummata ilisimatuut ulapputeriataarsimapput. Nannut aavini sananeqaataannilu misissugassat asiutinnagit misissorneqassammata nannut pisarineqarneranniit akunnerup affaa qaangiutsinnagu ilanngaaffigineqartarput. Nannut aavisa akui qaqortut, tinguisa enzymii tartuisa sanilequtaasa kiisalu qinersiisa hormoniliorneri misissortarpaat, nitrogenimik imerpalasumik misissugassat qerinasuartittarlugit.
Ilisimatuut misissuiartortinnatik KNAPK piniartullu misissuinerup qanoq ingerlanneqarnissaa pillugu isumaqatiginiarsimavaat. Piniartulli nannunniariartut ilisimatuunit orninneqartarnissaat sapernarnersaasimavoq.
Piniartut 5000 koruuninnattarput, nannullu ilaasa amii saarngilu ilisimatuut aamma pisiarisarpaat.
