Aviaja Egede Lynge: Tunumi meeqqat periusissiamit ikiorneqassapput

Taamaammat Tasiilamut Kuummiunullu angalanerminut atatillugu nalunaarusialiaata oqallisigineqarnissaa Aviaja Egede Lyngep  neriuutigaa.

Nalunaarusiammi takutippaa suli meeraqartoq ikiorneqarnissamik pisariaqartitsisunik.

Meeqqalli atugarisaat oqaluuserineqaleraangata kommunip iliuuserisinnaasai kisimik oqaluuserineqarajuttartut, Meeqqat Illersuisuata erseqqissaatigaa.

Inuilli atugarisaat pitsaanerulersinneqassappata ajornartorsiutit nagguii oqaluuserineqartariaqartut, Meeqqat Illersuisuata oqaatigaa.

Taamaammat nalunaarusiap periusissialiortitsinissamut oqallinnermik aallartitsinnissaa Meeqqat Illersuisuata neriuutigaa.

- Kommunimi sulisut amerlineqaannarpata ajornartorsiut aaqqinneqarnavianngilaq. Soorunami taanna pisariaqarpoq, kisianni meeqqat atugaat kommuninut annguttariaqannginnissaat anguniartariaqaraluaripput isumaqarpunga. Imatut paasillugu, meeqqat ajunngitsumik inuuneqarunik aamma kommunimut suliassanngortinneqartussaanngikkaluarput. Taamaammat inuiaqatigiit akisussaaffimmik tamakkiisumik tigusinissatsinnut nalunaarusiaq oqallissaarutaavoq, Aviâja Egede Lynge oqarpoq.

Aamma atuaruk Meeqqat illersuisuat: Ajornartorsiutit ammasumik oqallisigisigit

Oqallinnerlu taanna MIO-p aallartinniarsarilerpaa.

- Nalunaarusiaq  akisussaasunullu politikerinut assigiinngitsunut oqallissaarutigalugu apuuttaqattaassavarput, taannalu suliaq siulliussaaq, Meeqqat Illersuisuat Aviâja Egede Lynge oqarpoq.