Tunumi illoqarfiit Kommuneqarfik Sermersuumit avissaarniarput
Tamanna eqqumiippoq, Komunalbestyrelsemi ilaasortaq Justus Hansen oqarpoq. Kommunit kattussuunneqarnerisa kingorna tunumi sanaartornermut aningaasaliissutigineqartut aatsaat taama amerlatigipput.
Pissutsit ajornerulissapput - tunumi sanaartornermut aningaalissutit aatsaat tamaa amerlatigipput, tassa 60 millionit koruunit ukiormanna aningaasaliissutigineqarput. Sanaartornissamullu pisussaaffeqarpugut, inissianik qulinik ukiormanna sanaartortoqarpoq aamma aappaagu inissiat qulit sanaartorneqassapput, Justus Hansen oqarpoq.
Egon Poulsen Tasiilami illut tulleriaarlugit atsiornernik katersivoq. Taanna isumaqarpoq kommunit kattuussuuneqarnerisa kingorna tunumi sanaartornerit ikilisinneqartut.
- Sanaartorneq eqqarsaatigalugu Tasiilaannaanngitsumi Illoqqortoormiuni uninnikuuvoq, tamannalu pivoq kommunit kattussuunnerisa kingorna aamma sanaartorneq univissunngikkaluarluni sanaartukkat ikilinikuupput, Egon Poulsen KNR-imut taama oqarpoq.
Kommuneqarfik Sermersuumit tikkuarneqarpoq tunumi annertuunik iliuuseqartoqartoq - tassalu piorsaavimmik pilersitsisoqarpoq, imigassamik atornerluisut katsorsarneqarnissaannik iliuuseqartoqarpoq isumaginninnikkullu suliniutinik siuarsaasoqarluni.
Justus Hansenip eqqumiiginartippaa taannami isumaqarami pissutsit ajunnginnerulersimasut
- Kommuunit kattussuuneqarnerisa kingorna tunumi atugassartitaasut pitsaanerulersimasut isumaqarama, pingaartumik isumaginninerup tungaatigut aamma sanaartornikkut, taamaattumik eqqumigiinartippara tunu Kommuneqarfik Sermersuumit avissaartinneqarnissaanut atsiornernik katersisoqarmat, Justus Hansen oqarpoq.
Kommunalbestyrelsemut ilaasortaq, Iddimanngiiu Bianco, KNR-imut oqarpoq tunup kommuni ataasinngortinneqarnissaanut isummani, kommuunit kattussuunneqarnerisa nalilersorneqarnerat 2015-mi piareerpat aatsaat oqaaaseqarfigisinnaallugu.
