Tunumi atuartut nunaqarfinneersut katataaqqapput
Tasiilap pigisaaniittoq nunaqarfik Isortoq 100-t missaani inoqartoq meeqqanik 14-t missaaniittunik 1. klasseniit 8. klassemut atuartoqarpoq. Ilinniartitsunillu ilinniarsimasunik ilinniartitsisoqanngimmat timelærerit sisamat ukiuni arlersuni sulisinneqarput.
- Ilinniarsimasumik peqannginneq assut amigaatigisarparput, ilinniartitsisuunnginnatta nalorsaraangatta illoqarfimmut nunaqarfiilluunniit ilaannut saaffiginnittarpugut, taama oqarpoq Isortumi timelærereq Dines Jonathansen.
Atuagassiaq Ilinniartitsisoq allaaserisaqarpoq, Tasiilami klassit siorna terminsprøvermata kisitsinermi problemregningimi nunaqarfimmioq ataaserluunniit allataqarsimanngitsoq, tassalu imaannerarneqarluni apeqqutilluunniit ajornannginnerpaat akisinnaasimanngikkaat.
- Nunaqarfimmiut ilinniarsimasunik ilinniartitsisoqanngitsuniit aggersut, taakkuupput angusarlunnermik eqqorneqartartut. Terminsprøve-iinnaanngitsumi aammali misilitsinnikkut angusarisartagaat, ukiut qulingiluat qulillu ingerlanerini ilikkareersimasassaraluatik ukiup ataatsip marlulluunniit ingerlareeraangata aatsaat pissarsiarisinnaasarpaat, Tasiilami atuarfiup pisortaata tullia Anna Kûitse Kúko Qanoruumut oqarpoq.
Meeqqat atuarfianni atuartut 11 klassemut siornatigut killeqarput ullumikkulli 10 klassemiit atuarunnaartarlutik. Tamanna Anna Kûitse Kúko-p pissusissamisuunngitsutut isigaa.
- 10 klasseninngaanniit anisalernerat uagutsinnut tulluanngitsorujorujussuartut isigaarput, tassami nunaqarfimmiut Tasiilamut pigaangamik fysikkersimaneq ajorput, matimatikkersimaneq ajorput , taamatullu aamma tuluit oqaasii pinikuuneq ajorpaat, qallunaatullu oqalussinnaasaratik, taamaattumik ukiup ataatsip marlulluunniit ingerlaneranni sapinngisannguatik atorlugit ingerlaniarsarisarput, Anna Kûitse Kúko oqarpoq.
Avinngarusimasuni ilinniartitsisussaaleqisarneq qaangerniarlugu assigiinngitsutigut iliuuseqarfigineqartaraluarpoq,
ilaatigut soorlu tunumi atorfinittoq angerlarsimaffimminut ukiut tamaasa angalasarnissaanik neqeroorfigineqartarluni, tamannali iluatsilluartutut
oqaatigineqarsinnaanngimmat, ukiinngikkaluarluni iliuusissaq alla Kommuneqarfik Sermersuumit isumassarsiarineqarpoq.
- Imatut taallugu "Ilinniartitsisut angalasut" pilersitsiniarput. Ilinniartitsisut Nuummi atorfeqarsinnaapput imaluunniit illoqarfinni allani, taava nunaqarfiit illoqarfiilluunniit ilinniartitsisussaaleqiffiusut piffissami aalajangersimasumi orninneqarsinnaasassapput, taakkunaniinnerminnilu fagit pineqarneq ajortut ilinniartitsissutigisassavaat soorlu qallunaatoortitsillutik, tuluttoortitsillutik fysikkertitsillutik ilaalu ilanngullugit, taamaalilluni atuartitsinermi qaffassaanissaq anguniarneqarsinnaassaaq, iliniartitsisut kattuffiata IMAK-ip siulittaasua Sivso Dorph Qanoruumut taama oqarpoq.
