Tunnulissuit piniapilunneqarsimanertik qaangeriartuleraat

Ilisimatusarfimmi University of Washingtonimi ilisimatuut tunnulissuit qanimut misissuiffigisimavaat, ilaatigullu allaaseraat tunnulissuit 1966 tikillugu, tassa tunnulissuit eqqissisimatitaalerfiat tikillugu, piniapilunneqarsimasut siumut aallariartulersimasut aatsaat maanna takuneqarsinnaalersimasoq.

- Arfanniat piniapilunnerisa kingorna tunnulissuit siuariartoqqilersimanerisa ersersippaa, peqqissaartumik suliniuteqarnikkut arferit amerliartorteqqinneqarsinnaasut, Cole Monnahan, University of Washingtonimi misissuinermik annertuumik ingerlatsisuusoq oqaluttuarpoq.

Inuit suliniuteqarnerisigut annaanneqartut
Cole Monnahanip naliliinera malillugu, inuit suliniuteqarneriinnaasigut tunnulissuit amerliartorteqqinneqarsinnaasimapput.

- Tunnulissuit Californiap eqqaani uumasuusut piginiagaanerisa unitsinneqarneratigut arferillu taakku nakkutigineqalernerisigut amerliartoqqilersimapput. Taamaaliorsimanngitsuugutta tunnulissuit nungutaangajavissorsimassagaluarput - soorlu sumiiffinni allani taamatut pisoqarsimasoq.

Tunnulissuit 2.200-t Californiap eqqaani uumasuupput, oqaluttuarisaanermi amerlanerpaaffimmik 97 procentii missaanniillutik.

Ilisimatuut assersuuteqarlutik oqaluttuarput Sikuiuitsumi kujallermi tunnulissuit 220.000-t siornatigut sinnersimassagaat, 1990-imilu 1000-t missaanniilersimallutik, oqaluttuarisaanermi amerlanerpaaffigisaata 1 procentiata missaanniillutik.

Tunnulissuaq nunarsuarmi uumasut anginersaraat. Meterinik 33-nik takissuseqalersinnaavoq tonsinillu 200-nik oqimaassuseqalersinnaalluni.