Tunngaviusumik inatsisissaq pillugu isumalioqatigiissitaq Islandimut tikeraartoq

Islandimiut tunngaviusumik inatsisertik pillugu qanoq aaqqissuussinerat qanorlu suleriaaseqarnerat pillugu paasisassarsiornissaq angalanerup siunertaraa.

- Naluneqanngitsutut Island Danmarkimut aamma atanikuuvoq. Taamaammat Islandip naalagaaffinngoriartornerani aqqusaartorneqarsimasut misilittagarineqarsimasullu ilanngullugit paasisassarsiorfigiumallugit Islandi siulliullugu isumalioqatigiissitat tikeraarusussimavaat, tunngaviusumik inatsisissaq pillugu isumalioqatigiissitat tusagassiuutinut nalunaarummi allapput.

Isumalioqatigiissitat siulittaasuat, Vivian Motzfeldt (S), naapertorlugu angalaneq pissarsiviulluarpoq.

- Præsident Gudni Th. Johannessonip naapinnera assorsuaq pissarsiaqarfigivarput. Nunatta maanna alloriarnera soqutigalugu malinnaaffigigaa nuannerpoq paasillugu. Ataatsimooruteqarnerput malunnartorujussuuvoq, Vivian Motzfeldt oqarpoq.

Islandimiut immikkut ilisimasallit ikiuutissasut

Nunatsinni ilinniartitaanerup ilisimatusarnerullu qaffarsarneqarnissaat namminersulernissatsinnut pingaaruteqartorujussuusoq. Islandimi taamaaliorsimapput. Tamatuma saniatigut nunatta Islandillu inuussutissarsiornermi suleqatigiinnerulernissaat præsidentip kaammattuutigaa.

Motzfeldt naapertorlugu, Islandimiut ilisimasallit nunatta tunngaviusumik inatsisissaanik suliaqarnermi ikiuussinnaanissaannut periarfissaq præsidentimit ammatinneqarpoq, tamannalu isumalioqatigiissitap siulittaasuata nuannaarutigaa.