Tunitsiviit pingasut sullissinissamik isumaqatigiissummik naammassinnissimanngitsut

Arctic Green Foodip tunitsivii pingasut Namminersorlutik Oqartussanut sullissinissamik isumaqatigiissummik naammassinnissimanngitsut, aalisarnermut piniarnermullu Naalakkersuisup, Ane Hansenip, Ruth Heilmannip Siumumeersup paragraf 37 najoqqutaralugu apeqqutaanut akissummini oqaatigaa.
Allattoq Karsten Sommer, Elisa Isaksen
oktobarip 25-at 2012 06:26

Ruth Heilmannip apeqqummini tunngavilersuutigaa, aalisakkanik tunitsiviinit, Arctic Green Foodip ingerlataanit, aqqaniliusunit pingasuinnaat ammasut ilisimatitsissutigineqarmat, naak suliffeqarfik tunitsivinnik aqqanilinnik ingerlatsinissaminut ukiumut 11 millionit koruuninik aningaasaliiffigineqartaraluartoq.

Aalisarnermut Naalakkersuisoqarfiup aamma Arctic Green Foodip oktobarip ulluisa aallaqqaataanni ataatsimeeqatigiinneranni ilisimatitsissutigineqarpoq, tunitsiviit arfineq-marluk tunitsivittut ammatinneqartut, imaluunniit ammarneqarnissaminnut piareersarneqartut.

Tunitsiviit Illoqqortoormiuniittoq, Narsamijiniittoq, Qassimiuniittoq aamma Aappilattumiittoq matoqqatinneqartut, suliffeqarfiup nassuerutigaa, qanittukkullu ammarneqarnissaat pilersaarutigineqanngitsoq.

Ane Hansenip Radioaviisimut oqaatigaa, Arctic Green Food tunitsiviit pillugit maanna isumaqatiginiarneqartoq, taamaattumillu annerusumik maanna oqaaseqarsinnaanani.

Taamaattumik suliffeqarfiup sullissinissamik isumaqatigiissut naapertorlugu Namminersorlutik Oqartussanit pisartagai, ukiumut 11 millionit koruuniusut, ilaat utertinneqartariaqassanersut suli nalunarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq