Tunisat pisiallu oqimaaqatigiissaarneranni amigartoorujussuarpugut

Nioqqutissanut avataaneersunut Kalaallit Nunaata aningaasanik atuinera annertusiartuinnarpoq, avataaniilli nioqqutissanut tunisinermit aningaasat isertitat ikiliartuinnarlutik, nioqqutissanillu eqqussuinerup avammullu tunisinerup isertitatigut ungasissusaat annertusiartuinnarpoq. Tunisat pisiallu oqimaaqatigiissaarneranni amigartoorutit siorna 1,9 milliardi koruuniupput, tassa ½ milliardi koruuninik qaffallutik, amigartoorutillu ukiut 40-t ingerlaneranni aatsaat taama annertutigaat. Naatsorsueqqissaartarfiup maannamut kisitsisaataani tamanna takuneqarsinnaavoq.
juulip 25-at 2009 13:42

Amigartoorutit taama annertutiginerannut pissutaanerpaaq tassaavoq avataaniit nioqqutissanut aningaasartuutit 779 millioni koruuninik qaffariarsimanerat - tassa qaffariaat 21 procentiulluni. Naatsorsueqqissaartarfimmiillu oqarneq naapertorlugu tamatumunnga pissutaavoq avataaniit pisiassat akiisa qaffariarujussuarsimanerat. Akit 2007-imut naleqqiullugit 35 procentimik siorna qaffariarsimapput, aningaasanngorlugit 306 millioni koruuninik.

Avammut tunisineq malinnaasinnaanngilluinnarpoq. Avammut tunisineq 6 procentiinnarmik siorna qaffariaateqarpoq. Inuussutissanik uumasunillu avammut tunisineq qaffariaateqarfiunerpaavoq.

Tunisat pisiallu pillugit nalunaarusiaq uani atuarneqarsinnaavoq:

http://www.stat.gl/LinkClick.aspx?link=Udenhand%2fGr%c3%b8nlands+udenrigshandel+2008+forel%c3%b8bige+tal_+Publ_+DK.pdf&tabid=36&mid=391&language=da-DK

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq