Tunisassiorfinni saattualerisartut sisamararterutaat sapigaqalernissamut qanittut

Tunisassiorfinni saattualerisartut qassiit sapigaqalernermik ajornartorsiuteqalersimasinnaasut paasineqarpoq.

Tunisassiorfinni saattualerisartut sisamararterutaat sapigaqalernissamut immikkut qanittut nakorsat marluk misissuinerini ersertoq nakorsap misissueqataasup Jakob Bønløkkep oqaluttuaraa.

- Saattualerisartut sisamaagaangata ataaseq sapigaqalernissamut qaneqaaq, tamarmilli sapigaqalersimanermik ersiuteqanngillat, Jakob Bønløkke oqarpoq.

AAMMA ATUARUK Sisimiuni Upernavimmilu saattuarniartoqaqqissinnaanngorpoq

- Eqqoriarparput ukioq ataaseq sinnerlugu saattualerisimasut 5-10 procentii astmaqaleratarsinnaasut astmaqartulluunniit.

Suliffeqarfiit anersaaartuutinut assiaqummik immikkoortortamiluunniit allami suliffimmik neqerooruteqartartut

Jakob Bønløkkep nakorsaqataatalu Royal Greenlandip Polar Seafoodillu tunisassiorfiini saattualerisartut 2016-imili maannamut apersorsimasaat malinnaavigisimasaallu 286-iupput.

Polar Seafoodimi siulersuisuni siulittaasup Henrik Lethip KNR-imut oqaatigaa, nakorsat misissuineranni inernerusunik apuussivigineqareernermik kingorna saattualerisartut sapigaqaleratarsinnaanissaannik pinaveersaartitsineq sulissutigisimagitsik.

- Saattualerisarfimmi sulisut sulinerminni anersaartuutinut assiaquteqartarnikuunngillat. Maanna pinngitsooratik anersaartuutinut assiaquteqartartussaapput. Sulisullu suliatik pissutigalugit sapigaqalinnginnissaat qulakkeerumallugu tamanna piumasaqaataalersipparput, Henrik Leth oqarpoq.

Royal Greenlandip tunisassialerinermi ingerlatsisuata Sten Sørensenip oqaatigaa, saattualerinermi ajornartorsiutaasut Royal Greenlandimit ataavartumik malittareqqinnaarneqartartut.

- Tassa imaappoq, saattualerisartut sapigaqarnermik ajornartorsiutillit immikkoortortami allami saattualeriffiusanngitsumik sulilernissaannut neqerooruteqarfigisarpavut, KNR-imut mailikkut taama allappoq.

Sapigaqalersimasorisut allamik suliffittaartariaqarput

SIK-mi siulittaasoq Jess G. Berthelsen isumaqarpoq, saattualerisartut sapigaqalersinnaanerminnik ilisimatinneqartarnissaat pingaaruteqartorujussuusoq. 

SIK saattulerisartunut sinniisuuvoq, nakorsallu misissuisimasut Jess G. Berthelsen saattualerisartut ilisimatinneqartarnissaat pillugu isumaqatigaat. 

- Saattualerisartut sapigaqalersimasorisut allamik suliffittaarnissaminnik qulakkeerinnittarnissaat pingaaruteqartorujussuuvoq. Imaasinnaavorlu allaat sapigaqartuujunnaarnerannik malitseqartumik sulinermi atukkat pitsanngorsarneqarujussuartariaqartut, Jess G. Bethelsen oqarpoq.

AAMMA ATUARUK Upernavimmi tunisassiorfiliortoqartussanngorpoq

- Tamarmik qaangersinnaanngisaminnik sumiikkaluarunilluunniit astmaqaleratarsinnaapput. Taamaattumik piffissaatillugu iliuuseqarnissaat pingaaruteqarpoq, Jakob Bønløkke oqarpoq.

Misissuineq ingerlateqqinneqartariaqarpoq

Nakorsat paasisimavaat saattuat sapigaqalersitsisinnaasunik proteineqartut. Proteinilli sorlerpiaanersut saattuallu suaninngaanneersuunersut nalugallarpaat. Taamaattumik tunisassiornermi sutigut allannguisoqartariaqarnersoq imaluunniit suut eqqumaffigisassaasariaqarnersut oqaatigisinnaanngikkallarpaat.

Taamaattumik Jess G. Berthelsenip kissaatigaa misissuinerit ingerlanneqaannassasut.

- Sapigaqalernermik pilersitsisartut sorpiamiinnersoq ilisimaneqanngimmat isumaqarpunga paasiniaavigineqartariaqartoq. Tassanngaanniillu iliuuseqarluni, Jess G. Berthelsen oqarpoq.

SIK-p siulittaasuata Polar Seafood aamma Royal Greenland ulluni qaninnerni attaviginiarlugit KNR-imut oqarpoq.