Tuniniaaneq: cola liiterip affaa 200kr

Umiarsuaq nioqqutissanik pajuttoq ullut 20-it tulliuttut ingerlaneranni Kullorsuarmut tikikkumaartoq, Pilersuisumit oqaatigineqarpoq - Kullorsuarmi issingigassat nangiillu massakkorpiaq amigaatigineqarput.

Kullorsuarmi sodavandit amigaatigineqarput, tamannalu atorluarneqarpoq. Assersuutigalugu arnaq inuuusuttoq Facebookimi colamik liiterip affaanik 200 koruunilerlugu tuniniaavoq.

Amigaatilli taakkuinnaanngillat. Umiarsuarmi nioqqutissanik pajuttoq kingulleq qaammatit arfineq marluk matuma siornatigulli Kullorsuarmiippoq, ulluinnarnilu pisariaqartitat, immuk, issingigassat, margarinat, nangiit allallu marsip qaammataanili amigaatigineqartut tusarfigut oqaluttuarput.

- Ukiup siuliani nioqqutissat Kullorsuarmut pajugutigineqarlutik tunineqarsimasut aallaavigalugit eqqoriarneqartarput nioqqutissat suut qanorlu annertutigisut Kullorsuarmukaattariaqarnersut, Pilersuisup pisortaa, Frederik Olsen, oqarpoq.  Kisianni nioqqutissat ulluinnarni pisariaqartitat Kullorsuarmi ukioq manna tunineqarsimasunit siorna tunineqartunit amerlanerusimapput, aalisartut amerlanerusut Kullorsuarmut tunisisarsimammata, Frederik Olsen nangippoq.

- Kullorsuarmi nioqqutissanut toqqorsivik inissaqarnikkut killeqarpoq  taamaattumillu nioqqutissanik nassitsinissaq sioqqullugu initussutsit amerlassutsillu eqqoriarneqartarlutik, Frederik Olsen oqarpoq.

Kullorsuarmi Pilersuisup niuertarfiani nioqqutissanik amigaateqarneq Frederik Olsenip ajuusaarutigaa, ulluinnarnili pisariaqartitat niuertarfimmi pigineqarnissaat naammassiniarneqartoq oqaatigulugu.

Equutissat amigaatigineqartut, Pilersuisumi pisortap nassuerutigaa - nangernilli amigaateqartoqarneranik ilisimasaqannginnerarluni.

Pilersuisup nioqqutissanik nunaqarfunnut avinngarusimasunullu pilersuinera, Namminersorlutik Oqartussanut kiffartuussinissamik isumaqatigiissuteqarnermi tunngaveqarpoq, taamaaliornerlu aningaasanut inatsisikkut 36 millionit koruuninik aningaasaliiffigineqarluni.

- Kiffartuussinissamik isumaqatigiissummi allassimasoq, nioqqutissat aalajangersimasut inoqatigiit ulluinnarni atugassarititaat nioqqutigisussaatitaagigut aamma umiarsuup tikinneranit kingullermit nioqqutissat ullussaminnik  qaangiisimasut isiginiarneqassassut Pilersuisumi pisortaq oqarpoq.

Umiarsuaq nioqqutissanik pajuttoq sapaatit akunneri marluk qaangiuppata Kullorsuarmut tikissasoq Frederik Olsenip naatsorsuutigaa.

- Royal Arctic Line-p umiarsuaq attartugaa Vestlandia Kullorsuarmut juunip aqqarngani tikinissaa naatsorsuutigaarput taamanikkussamullu neriuppugut ukiup sikua nungoreersimassasoq.

Umiarsuarli talissinnaassanngippat, nioqqutissat sikup sinaavatigut 5 kilometerisut avasitsigisumit assartorneqarsinnaapput, soorlu siornatigut taamaaliortoqartareerimasoq, Frederik Olsen oqarpoq.