Danmarkimi tunillatsittukinnerusoq: Tunillatsissimasut procentinngorlugit qaammatini sisamani aatsaat taama ikitsigisut

Danmarkimi tunillatsissimasutut uppernarsarneqartut ulloq ataaseq kingulleq 760-iupput.

Statens Serum Institut (SSI) taama paasissutissiivoq.

Tunillatsissimasut nutaat paasineqartut misissuinerit 114.074-it akornanneersuupput.  Tamanna tunillatsissimasutut paasineqartut procentinngorlugit 0,67-iuvoq, septembarillu aallartinneraniilli taama ikitsigisimanngillat.

SSI-mili tunillatsissimasunut kisitsisini sukkasuumik misissuinermi kisitsisit ilaanngillat.

Sukkasuumik misissuinernit 22.025-nit tunillatsissimasut 146-t pingasunngornermi paasineqarput.

AAMMA ATUARUK Nakorsaanerup akiuussutissat ikinnerusut naatsorsuutigigai: Kapuutit imai Danmarkimut tunniunneqartussat 100.000-inik ikinnerusut

Danmarkimi virusimik Tuluit Nunaannit allanngortumik 383-it tunillatsissimasutut uppernarsarneqartut pingasunngornermi naatsorsuinerup takutippaa, virusimillu taassuminnga tunillatssimasut amerlanerupput. Kisitsisit tallimanngornermi nutarteqqinneqarumaartut, SSI paasissutissiivoq.

Danmarkimi coronavirusimik tunillatsissimallutik napparsimmavinni uninngasut 21-nik ikilillutik 745-nngorput. Taamaakkaluartorli peruluttut uninngavianniittut sisamanik amerlillutik 136-nngorput.

Tamatuma saniatigut coronamik tunillatsissimallutik toqusut nutaat 37-t nalunaarsorneqarput, taakku ullormi ataatsimi toqusutut nalunaarsorneqarsimasut amerlanerpaat pingajuanniipput.

Ullumi ataatsimi kingullermi virusimut akiuussutissamik kapitittut amerlanerulaalerput.

Innuttaasut 3,07 procentii coronamut akiuussutissamik siullermeertumik maanna kapitissimalerput.

Tassa imaappoq inuit 178.969-it akiuussutissalerneqarlutik aallartipput. Taakkunannga 6808-t marloriarlutik kapitereerput.