Tunillanneqarsimasut qaammatip siuliata ingerlanerani aatsaat taama ikitsigisut
Danmarkimi coronavirusimik tunillanneqarsimasutut siumorneqartut ullup unnuallu kingulliit ingerlaneranni 290-iupput.
Naalagaaffiup nappaatinut akiuussutissaliorfia, Statens Serum Institut, taama ilisimatitsivoq.
Tunillanneqarsimasutut siumorneqartut 290-it qaammatip siuliata ingerlanerani aatsaat taama ikitsigipput. Kingullermik taama ikitsigimmata tamanna septembarip ulluisa qulingiluaanni pivoq.
AAMMA ATUARUK Danmarkimi qaammatip ataatsip missaata ingerlanerani aatsaat taama tunillatsittukitsigisoq
Tamanna nuannaarutissaasoq, Københavnip Universitetiani professori Allan Randrup Thomsen oqarpoq.
- Kisitsisit qimerlualaaraanni takuneqarsinnaavoq tunillanneqarsimasut kigaatsumik ikiliartortut. Malunnaatilimmiinngitsoq, kisianni ikiliartorput, professori oqarpoq.
Danmarkimi peqqinnissaqarfik artukkerneqanngitsoq, Allan Randrup Thomsen oqarpoq.
- Inuit napparsimmavimmi unitsinneqartartut angerlartinneqartullu amerlaqatigiingajapput, taanna oqarpoq.
Inuusunnerit ataatsimullu isigalugu peqqinnerusut tunillanneqarnerusarunartut katsorsaasarnerlu aamma pitsaanerulersimasoq, Allan Randrup Thomsen isumaqarpoq.