Imermik tunisassiorsimasoq: Aningaasartuuteqarpallatta avammut tuniniaajunnaarpugut
Imermilli avammut niuerniarneq ima ajortigaaq allaat suliffeqarfik matusariaqarsimasoq, pisortaasimasoq oqarpoq.
Maannalu sermimit imermillu tunisassiorneq pillugu nutaamik periusissiamik naalakkersuisut tusarniiaassuteqalerput.
Ove Berthelsen 2009-mi Greenland Spring Waterimi, tassa Schweitziunit aningaasaliiffigineqartumi pisortanngorpoq. Pisortaasimasup suliffeqarfiup piunera sivikinaarpaa.
Ukiut marlussuinnaat tunisassiorneq ingerlanniarsarigaluarlutigu unitsiinartariaqarsimavarput.
Pissutsit assigiinngitsut kinguarsaatigalugit suliassaq aatsaat imaluunniit tunisassiorneq aatsaat 2009-mi aallartikkaluarpoq, taama oqaruma.
Innaallagiaq akisusimaqaaq, Royal Arctic Linellu nassiussanut kisermaassinera pissutigalugu akit qaffasissimapput, Ove Berthelsen oqarpoq.
AAMMA ATUARUK Imeerniarneq ajornakusoormat akileraarutit appasinnerussasut
Imeq tunisassiarilinnginnerani nukissiorfimmiit pisiareqqaartariaqartarsimavarput illoqarfimmi kubik meterimut akia akilerlugu.
Taava taassumap saniatigut aamma puiaasaaqqamut royalty aamma akileqqaartariaqarparput.
Imermillu tunisassiorniarnerigaluaq iluatsinngitsoorpoq, taamaattumik imermik tunisassiortartuusimasup Namminersorlutik Oqartussanut Ove Berthelsen kaammattuuteqarpoq
Isumaqarpunga Namminersorlutik Oqartussat eqaannerusumik aammalu aallarteriarnissamut oqinnerusumik periarfissiissimasuuppata pissutsit allaanerusumik ingerlasimasinnaassagaluartut.
AAMMA ATUARUK Nilammit imeq Nunatta ilisarnaatigilersinnaagaa
