Nilammit imeq Nunatta ilisarnaatigilersinnaagaa

Franskit viinniutaat pullartaaralik Champagne, Grækerit immussuaataat Feta danskillu guuloruujuutaat Lammefjordsgulerødderit, tamarmik inatsisitigut illersugaapput.

Taaguutaat matumani pineqarpoq. Assersuutigalugu viinnit pullartaarallit Italiameersut Champagne-imik taaguuteqaqqusaanngillat, immussuillu Tyrkiameersut Feta-mik taagoqqusaanatik.

AAMMA ATUARUK Imeerniarneq ajornakusoormat akileraarutit appasinnerussasut

Pilersaarusiami nutaami sermimik imermillu avammut tunininiaanissamut tunngatillugu innersuunneqarpoq Naalakkersuisut misissussagaat sutigut pitsaaquteqassanersoq imeq Kalaallit Nunaanneersoq taamattuttaaq illersorneqalissappat.

Assersuutigalugu taaguuserneqarsinnaavoq 'Imeq Sermersuarmiit' (”Gletsjervand”)

Danmark-imi EU-imilu tamakku pillugit inatsiseqarpoq. Tamaani nerisassanut sumiiffinniit aaliangersimasuniit imaluunniit immikkuullarissumik ileqqutoqqat aallavigalugit sanariaaseqarnermi, taaguutigisat illersorneqarput, taamaasillunilu tunisassiortut kisiartaallutik taaguut atorsinnaallugu.
Fødevarestyrelsen Danmarkimiittoq naapertorlugu nerisassat naasorissaanikkullu tunisassiukkat 1000-it 2011-imi illersugaapput. Amerlanerpaat Europap kujataani.

Innersuussut pilersaarusiamut nutaamut innersuussutit 21-iusut akornaniippoq, imermik sermimillu tunisassiornissamut pilerinarsaasussat.

Tusarniaaneq novembarip 3-anut killeqarpoq. Ilanngutassiamik William Kriegel kalaallisuunngortitsisuuvoq.