Imeerniarnermut periusissiaq: Imeerniarneq ajornakusoormat akileraarutit appasinnerussasut
Imeq nunarsuarmi piumaneqaleraluttuinnarpoq, pingaartumik Asiami Indiamilu.
Politikkilli nunatta imermik peqqumaassui atorluarusukkaluaraat nuannersumik pisoqartinnagu, suliassaqaqaaq.
Imermik puiaasanut maqitamik niuffanneq akuliuffigissallugu ajornakusoortorujussuusoq, siunnersuisoqarfiup Price Waterhouse Coopers-ip misissuinerata takutippaa.
Unammillerneq angeqaaq, nunarpullu soorlu Canadamut, Alaskamut Fijimut Islandimullu unammillerluni nunarsuarmi imeerniaqataassaguni pitsaassutsikkut, assartuinikkut suliffeqarfiillu atugaasigut unammillersinnaasariaqarpoq.
AAMMA ATUARUK Kielsenip nilak imerlu tunisassiaraluit misilittarniarai
Periusissiaq taamaammat avammut tuniniaanermik aallartissutaasussanik arlalinnik innersuussutitaqarpoq. Imermik nunanut allanut tuniniaasut nunatta karsianut akitsuutinik, akileraarutinik pisuuussutinillu atuinermi akiliutini akiliisussaapput. Akiliutilli katikkaanni nunani allani akiliutinit qafffasinneruneri unammillernartuuvoq
Piginneqatigiiffinnut akileraarut aamma sinneqartoorutinit akileraarut katikkaanni maannakkutut 40 procentiujunnaarluni 25 procentinngussasoq, ilaatigut innersuussutigineqarpoq. Taava aamma pisuussutinik atuinermut akiliut maannakkutut literimut 10 øriujunnaarluni 4 ørinngussasoq inassutaavoq.
AAMMA ATUARUK Qimaasut imissaqartinnerisigut nussortoqarnera unitsinneqassasoq
Kiisalu suliffeqarfik pilersisinneqarlaaq ukiut tallimat tikillugit akileraassanngitsoq Naalakkersuisunit periarfissinneqarsinnaasariaqarpoq. Taamaaliorneq suliffeqarfinnut, aallartinissarnerminni illuliornikkut atortulersornikkullu aningaasartungaatsiartussanut, qiimmassaataassaaq.
Nunatta ilaani sumi tuniniagassanngorlugu maqikkuminartumik imeqarnersoq, misissuisoqassasoq aamma innersuussutaavoq.